گفتوگۆ لەگەڵ سمكۆ ئەحمەد
سازدانی: سۆران ئازاد چۆمانی
Soran_darbandy@yahoo.com
دیارە مایەی خۆشحاڵی نییە، كەئێمە هونەرمەندێكی شێوەكاری
وەكو (سمكۆ ئەحمەد) بە (خوێنە‌ر/ بینەر)ی خۆمان بناسێنین، لە كاتێكدا ئەو
لە‌مێژە لای (خوێنە‌ر/بینەر)ی دەرەوەی كوردستان ناسراوە، بە‌وە‌ی تابلۆكانی
ئاستێكی بە‌رزیان هەیە، ئەو ئاستەی هەر هونەرمەندێكی شێوە‌كارر پێی بگات،
ئەوا بە‌رهە‌مە‌كانی دە‌بنە مایەی سە‌رنجی بینە‌رێكی زۆر لەسەر ئاستی جیهاندا.
بێجگە لە (كاروان كاكەسوور)، هیچ نووسە‌رێكی دیكە‌م نەدیوە بە زمانی كوردی
باسی لە تواناكانی ئەو هونە‌رمە‌ندە كردبێت. ئە‌مە‌یە چارە‌نووسی هەر نووسە‌ر و
هونە‌رمە‌ندێك، كاتێ ئەو ئاستە ستانداردە تێدە‌پە‌ڕێنێت . هەر دەڵێی
دە‌یانە‌وێت بە سڕینە‌وە و گاَلتەپێكردن سزای ئەو جیاوازیانەی بدە‌ن. لەولاشە‌وە
رۆژانە تێكستی سادە لێرە و لەوێ رەواجی پێدەدرێت.ئێمە لەم پێشەكیەدا مەبەستمان
نیە زیاتر لە تابلۆكانیدا ورد بینەوە، بەڵكو وەك سەرەتا ئەم گفتووگۆیەم لەگەڵ
سازكرد.
سۆران ئازاد: بەختیار عەلی دەڵێت"ئەوەی بەزمان ناگوترێت، هونەر بەرجەستەی دەكات".
كاتێك بە قووڵی لە تابلۆكانت ورد دەبینینەوە، دەبینین ئەو رەنگ و هێڵ و فیوگەرانە
زادەی خەیاڵی فراوان و روانینی بێسنوورن. بەبروای تۆ هونەر تاچەند خۆ رزگاركردنە لە
حەقیقەت؟ تۆ تاچەند لە هونەردا خۆت دۆزیوەتەوە؟
سمكۆ ئەحمەد: بەبروای من هونەر خۆرزگاركردن نیە لە حەقیقەت، بەڵكو دارشتنەوەی
حەقیقەتە لە خەیاڵ و زهنی هونەرمەندەكەدا. من زیاتر لە هونەردا خۆم دۆزیوەتەوە هەتا
لە ژیاندا. لەهونەردا من هەر مناڵەكەی گەرەكی رزگاریم. زەمەن گۆرانم لا دروست
ناكات. كاتێك چاوم لە كانڤانسەكەم سەما دەكات، كاتێك دەستم ختوكەی رەنگەكان دەدات،
من لەم سەردەمە نیم، بەڵكو لە جیهانی فەنتازیای خۆمدا دەژیم، جیهانێك خۆم دورستی
دەكەم و خۆم رەنگی دەكەم، چۆنم بوێت وای دەهێنم و دەیبەم. وەك چۆن كەسانێك
تەسەوریان بۆ خودا هەیە، كە جیهانی ئێمە بەدەستی ئەو دێت و دەروات، منیش دەبمە ئەو
خودایە و جیهانێك بەئارەزووی خۆم دروست دەكەم. من ئەم جیهانەیەم پێخۆشترە هەتا
جیهانەكەی دەرەوەی تابلۆكان. خۆشم ون نەكردووە لەم جیهانەمدا لەبەر ئەوە پێویست
ناكات بەدوای خۆمدا بگەریچم و خۆم بدۆزمەوە.
سۆران ئازاد: چیی وای لێكدرویت هەست بكەیت هێزێكی شاراوەی دیكە بۆ خوڵقاندنی
جیهانێكی خەیاڵی هەیە؟ تەعبیركەری ئەو حیهانەش تەنها "هونەر و ئەدەب"ە، ئایا
دۆزینەوەی زمانی تەعبیركردن لەخود پێویستی بەوەیە هێزێك پاڵت پێوەبنێت؟ ئەو هێزە چ
شكست بێت لە شتێك یان هەستكردن بێت بەنەزانی....هتد، ئەو هێزە چی بوو وای لە تۆ كرد
تابلۆ بكێشیت و شیعر بنووست؟ بەبروای تۆ هێزی شاراوەی "هونەر و ئەدەب" لە كوێدایە؟
سمكۆ ئەحمەد: وەك چۆن ئێمەی ئینسان باڵامان جیاوازە، ئاواش قووڵی ناخمان جیاوازە.
لەناخی هەر یەكێكماندا جیهانێكی خەیاڵی هەیە، "خەونە، خۆشەویستیە، سێكسە،
گەنجبوونەوەیە...هتد". هونەرمەند ئەو جیهانە فەنتازیایە بەرجەستە دەكات، كەلەدەست
كەسی ئاسایی نایەت. من هەردەم حەزم كردووە چیرۆكەكانی ناخی خۆم بگێرمەوە و
تەعبیریان لێبكەم، بۆیە من بە رەنگ و وشە كۆنێكشنی نێوان جیهانی ناوەوەی خۆم و
جیهانی دەروەی خۆم دروست دەكەم. من لەهونەردا بەدوای ئازادیەكانی خۆمدا دەگەرێم،
كەلە جیهانی دەروەدا لێم زەوت كرابوون یان زەوت كراون. شتە بڤەكان، قەدەغەكان، پر
لەلەزەتەكان، ئەو شتانەی لەجیهانی دارێژراوماندا گەر بیكەین، لەوانەیە لەسەری بەرد
باران بكرێین، بەڵام لە جیهانەكەی مندا لەسەری گوڵ باران دەكرێن.
سۆران ئازاد: وەك دەبینین لە تابلۆ و شیعرەكان و گۆرانیەكەشتدا، تاراوگە كاریگەری
لەسەرت هەبووە، تەنانەت چیرۆكنووس و رۆشنبیر "كاروان عومەر كاكەسوور" لەیەكێك لە
چاوپێكەوتەكانیدا كارە هونەریەكانت وەك نموونەی هونەری تاراوگە دەهێنێتەوە، سەرەرای
ئەوەی زۆر بەكارەكانت سەرسامە و پێی وایە دونیابینی تۆ و هی ئەو زۆر لەیەكتر نزیكن،
بەڵام ئەو بە وشە و تۆ بە تابلۆ چیرۆك دەگێرنەوە، لەمەوە ناچارمان دەكات بپرسین
ئاخۆ تارواگە لای تۆ مانای چییە؟ تاراوگە چی پێبەخشیووت؟ چیشی لێ ون كردوویت؟ تا
چەند لەخۆتی نزیك كردویەتیەوە؟
سمكۆ ئەحمەد: تابلۆ و هۆنراوەكان هی منن، بەڵام گۆرانیەكە هی من نییە، بەڵكو هی كاك
"كڵپە"یە و من تەنها كارەكەم بۆ دروست كردووە و لە كلیپەكەیدا بۆیم نمایش كردووە.
كاك "كاروان عومەر كاكەسوور" نوسەرێكی بەتوانایەو ئێمە تەنها لەرێی ئینتەرنێتەوە
یەكتر دەناسین و سوپاسی دەكەم بۆ نوسینەكانی سەبارەت بەمن. باسی تاراوگە دەكەی، من
كە ساڵی 1996 كوردستانم بەجێهێشت، سەرەتایی تەمەنی هونەریم بوو. تاروگەیەكی دووریش
كەپێی دەڵێن كۆتایی جیهان، ئەویش وڵاتی یابانە. لەوێی جارێكی تر لە سفرەوە ژیانێكی
نوێم دەست پێكردەوە، جادەكان، خەڵكەكان، هەموو تازە بوون لام. هەرگیز چاوەرێی ئەوەم
نەدەكرد رۆژێك كەسێك ببینم، كە پێشتر ناسیبێتم. واتە هەموو شتەكان تازە بوون.
جیهانێك بوو تەنها ئاسمان و مانگەكەی شەوم تێدا دەناسی. وەك مناڵێكی ساوا دەبوایە
لە دادە و بابەوە فێری زمانەكەیان ببم. گران بوو، بەڵام ناخۆشیش نەبوو. لە
جیهانەكەی ناخی خۆم دەچوو، بەڵام بە واقیعی. من بۆیەكمجار تەعاروفم لەگەڵ خۆمدا كرد
لە تۆكیۆ، چونكە تەنها خۆم لە زمانی خۆم دەزانی. خۆم لەگەڵ خۆمدا رابردوومان هەبوو
پێكەوە. هیچ كەسێك نەبوو بەیانیان خەونەكانی خۆمی بۆ بگێرمەوە. كەس نەبوو بڵێت وا
برۆ و وا بێت. من فێری ئندیڤیدوالتیتی (خودی) نەبووبووم لە كوردستان. فێری ئەوە
نەبووبووم بریاردەر و جێبەجێكەریش بم لەهەمانكاتدا، بۆیە خۆم دۆزیەوە و گەورەترین
گۆرانم لە ژیانی خۆمدا دروست كرد. هەر بە یابانەوە نەوەستام، بۆكاری ئینسانی چووشم
بۆ زەویە حەزێنەكانی جیهان، زیاد لە 3 ساڵم لە سیرالیۆن و لە ئەفریقا و كۆسۆڤۆ و
ئەلبانیا و ئەفگانستان و پاكستان و ئەو شوێنانە بەسەر برد، كەمانای ژیان وا
ئالۆسكاوە بە ئازارەوە زەحمەتە جیایان بكەیتەوە لەیەكتر.
سۆران ئازاد: لە تابلۆی "ئاسمان دایكمە"دا دەلالەت لە ئازاری دایكەكان دەكەیت.
تێروانینی تۆ بۆ دایك چییە؟
سمكۆ ئەحمەد: تابلۆی ئاسمان دایكمە، ئاسمان ئاوی زەوی دەدات و دایكمان شیرمان
دەداتێ و ژیان دروست دەكەن. من دایكم زۆر خۆش دەوێت. دایكم رەمزی هێز و میهرەبانی
بوو لە ژیانمدا. كاتێك باوكم كۆچی ئەبەدی كرد، دایكم تەنها 29 ساڵ بوو لەگەڵ 7
منداڵدا ژیانێكی خۆشمان هەبوو هەتا رۆژی 4/4/2008، كە جادەی سالم و شۆفێرێكی مناڵی
بێ مۆڵەتی بێهەست لەوڵاتێكی بێ یاسا و بێرەحم بریاریاندا نەگاتە ئەو بەری جادەكە
لەساڵی 1968ەوە شاهیدی خەونەكانین. خەونەكانیان كوژاندەوە بۆ ئەبەد. گەورەیی دایك
لە تابلۆ و وشە زۆترە.
سۆران ئازاد: لە ماڵپەرە تایبەتیەكەدا لە ژێر ناونیشانی "www.simko-art.com"
چاوپێكەوتن و نوسینی میدیاكانی بیانی بەتایبەتی میدیاكانی وڵاتی ژاپۆن لەبارەی تۆ و
كارە هونەریەكانتەوە دەبینین، بەڵام لە میدیا كوردیەكان كەمتر، تۆ ئەمە بۆچی
دەگەرێنیتەوە؟ تێروانینی تۆ میدیا كوردیەكان چییە؟
سمكۆ ئەحمەد: میدیا كوردیەكان جارێ هەرزەن، لای خۆمان سیاسەت هونەری بۆگەن كردووە،
لەگەڵ رێزمدا بۆ هەندێك گۆڤار و بڵاوكراوە، كە ئەوانیش چاڵێنج دەكەن بۆ راگرتنی
نرخی هونەر. لەوانەیە لە ژاپۆندا لەژمارە دانیشتووانی هەموو كوردستانی گەورەش زیاتر
خەڵك بەكارەكانمەوە ئاشنا بووبن، بەڵام لای خۆمان ئەو بایەخەم نەدیوە. پێم وابێت
دووریم بووە لە حیزب و پارتە دەستەڵات دارەكانەوە. هەر واشم پێ باشە، كەبەكەسێكی
ئازاد بمێنمەوە. ژیان وا پر ماناترە. ئەوەشت لەبیر نەچێت گەر چاوپێكەوتنێكی
تەلەفزیۆنی یابان بكەیت بەئاسانی دەگەیتە 130 ملیۆن بینەر، من لەرێی خودی خۆم و
چالاكییە هونەریەكانمان كوردستانم بەرەنگەكەی بەهەشت گەیاندۆتە یابان. ئەوا ئەركی
سەرشانی نەوەی ئێمەیە.
سۆران ئازاد: تۆ چەند تابلۆیەكت هەیە لەسەر جینۆسایدی ئەنفال. ئەنفال وەك
جینۆسایدێك تاچەند كاری لە خەیاڵەكانت كردووە؟ خوێندنەوەی تۆ بۆ ئەنفال چییە؟
سمكۆ ئەحمەد: ئەنفال لەبەردەم لووتی گەنجێتیمدا روویدا، لەرزەیەك بوو تۆی ترسی
بۆیەكمجار رواند لە دڵمدا. ئێستاش قیژەی ئەو كەسانەی لە بێدەنگیدا زینەبەچاڵ كران
دێنە گوێم. بیابانەكان بوونە ئەژدیها و مناڵە پێڵاوە لاستیكەكانیش بوونە ئاسكی نێو
جەنگەڵی پڵینگە برسیەكان. من هەردەم وا هەست دەكەم ترسنۆكی ئێمەش لەو كاتەدا بەشێكە
لەو تاوانە. حەز دەكەم بە تابلۆكانم پاداشتیان بدەمەوە، چونكە دەكرا من و تۆش
ژمارەیەك بوونایە لە ژمارەكانی ئەنفال. چونكە گەر ئەوان تاوانێكیان هەبووبێت كە
كورد بوون، ئێمەش ئەو تاوانەمان هەبووە. ئەو وڵاتەی ئێمە هەمان بوو چەند بۆگەن بوو،
وەكو تابلۆیەكی زەیتی وابوو هەتا دوور نەكەوتمەوە هەموو تابلۆكەم نەدی. خوێندنەوەی
من بۆ ئەنفال هەر ئەنفالە. ئەنفالەكەی ناو كتێبە پیرۆزەكە و ئەنفالەكەی سەدام
بۆگەنیان مێژوو كاس دەكات.
سۆران ئازاد: تۆ بۆ كاری خێرخوازیی رووت كردۆتە چەند وڵاتێك لەوانە "سیرالیون و
ئەفریقا و كۆسۆڤۆ و ئەلبانیا و ئەفگانستان و پاكستان " وەك خۆشت ئاماژەی پێدەدەیت
ژیان لەوێ وا رسكاوە بە ئازار كەئەستەمە لێكیان جیا بكەینەوە. ئامانجت چیبوو لەو
كارە خێر خوازیانەت؟
سمكۆ ئەحمەد: بەرێز كاك سۆران من لەگەڵ رێكخراوی شنە بای ئاشتی یابانی كار دەكەم و
لەگەڵ ئەوانیشدا هاتووم بۆ یابان، من وەك ئەندازیارێكی مەدەنی هاوكاری ئاوارەكان
دەكەم لە دیزاینی كامپ و قوتابخانە و جادە بان..... لای من مرۆڤ سەرەكیە نەك
نەتەوە، لە هەموو شوێنێ ئاسمان شینە، من لەو زەویە حەزینانەی كەبۆیان دەچم، هەست
بەوە دەكەم ئازارەكان یەك شتن، بەڵام زمانی تەعبیرەكان جیاوازن، ئامانجی من لەو
وڵاتانەی بەخۆبەخش كارم تیا كردوون تەنها لایەنە مرۆڤایەتیەكەی كە كامەرانی بە رۆحم
دەدات.
سۆران ئازاد: ئەگەر ئەدەبی كوردی چ شیعر و چ چیرۆك و رۆمان كەم و زۆر بووبێتە جێگای
رەخنە و لێكۆڵینەوە، بەڵام هونەری شێوەكاری زۆر بە دەكمەن قسەی لێوەكراوە. ئایا تۆ
هۆكارەكەی بۆچی دەگەرێنیتەوە؟ ئایا پێت وایە قسەكردن لەبارەی ئەو هونەرەوە زەحمەتر
بێت لە هی شیعر و چیرۆك و رۆمان؟
سمكۆ ئەحمەد: لای ئێمەی كورد ئەدەب و شیعر مێژوویەكی زووتری لەهی شێوەكاری هەیە.
پێم وانیە نوسین لەبارەی شێوەكاریەوە هێندە گران بێت، چونكە شێوەكاری تاقە بواری
هونەرە، كەپێویستی بە وەرگێران "ترجمە" نیە. باشترین جۆری هونەرە یان ئارتە، كە
بائاسانی بگاتە گەلانی تر، من نوسین و وێنە كێشانم پێخۆشە. هونەرمەند دەتوانێت
تابلۆیەك بە وشە بكێشێ و لەهەمانكاتدا دەتوانێت چیرۆكێك یان هۆنراوەیە بە رەنگەكان
بكێشێت.
سۆران ئازاد: تێكەڵكردنی مرۆڤ و شتەكان، بەمانایەكی دیكە تێكەڵكردنی گیاندار و
بێگیان، یەكێكە لە تایبەتمەندیەكانی كارە هونەریەكانت، كەهەمان ستایل لای كاروان
كاكەسووریش هەیە بەتایبەتی لە رۆمانی "مامزێر"دا. تۆ ئەم لێكچوونە بۆچی
دەگەرێنیتەوە؟ لات وایە بیركردنەوەی قووڵی تۆ و كاروان بەو ئەنجامەی گەیاندوون؟
سمكۆ ئەحمەد: من ئەو رۆمانەی كاك كاروانم نەخوێندۆتەوە جارێ، بەڵام ئێستا حەز
دەكەم بیخوێنمەوە بزانم ئەو لێكچوونە چییە كە كاك سۆران هەستی پێكدرووە. لای من
ئینسان بەشێكی رووداوەكانی ناو تابلۆكانمن، هەردەم لە سەحرای خەیاڵمدا خۆم وەك
ئادەم بەدوای ئادامێكی تردا دەگەرێم، خۆم لە تابلۆكاندا هەم، بەڵام نابیندرێم.
تەنها خۆم هەست بەو مەوقیعیەتەی خۆم دەكەم، شتەكان تەواوكەری چیرۆكەكانمن، تایە
رەمزی زەمەنە، كە هەردەم لە دەوران دایە، مناڵە جل سوورە پانتۆڵ شینەكەی رەمزی
بەرائەت و هەڵگری پاشەرۆژن. هەرگیز دەم و چاوی نیشان نادات. لە تابلۆیەكدا میز
دەكاتە قودەی ئەنفالچیەك لە قەبرستانی سەحرادا، لەلاەیەك تایەكەی پێیە سەیری حاجی
لەقلەقەكەی سەر شێخەڵا دەكات، كەلەجەنگی ناوەخۆدا كوژرا، لەلایەك سەیری دیمۆنیستەرە
شینە لانی حامیەكە دەكات و سەیری خۆری باوەشی شاعیر ئەبوبەكری عەلی دەكات......
سۆران ئازاد: حەز دەكەم كەمێكی دیكە لەسەر پرسیاری پێشوو بوەستم، چونكە هەست دەكەم
ئەو پرسیارە رووبەرووی هەر كەسێك دەبێتەوە، كاتێك سەرنج لە تابلۆكانت دەدات، وەك
ئەوەی دەبینین مرۆڤ لەگەڵ بێشكە "لانك"دا تێكەڵ بووە. سەرچاوەی ئەم بیرۆكەیە
لەكوێوە هاتووە؟
سمكۆ ئەحمەد: تابلۆی بێشكەی تاوان باس لە قۆناغەكانی دروست بوونی دیكتاتۆریەت
دەكات، بێشكە رەمزی كاتە، كات بۆ گۆرینی بونەوەرێكی زەحیف بۆ بەهێز. گەر سەیری دەم
و چاوی ئەو درندەیەی ناو بێشكەكە بكەیت، دوو دەمووچاو دەبینیت، 2/3 دەمووچاوەكە
بگرە لەبەشی خوارەوە سەیری تەنها بەشی سەرەوە بكە، دەمووچاوی مناڵێكی تۆقیو دەبینیت
بتڵە شیرەكەی پرە لە خوێن و دەست رازەكەی بۆتە مار. دەمووچاوەكەی تر دیوە تاریكەكەی
ئەو دێوەزمە نیشان دەدات كەچاوەرێیە لەسەر ئێسك و بازووی ئێمەی ئینسان گەورە بێت و
بتوانێت هەناومان هەڵكۆڵێت و لەناوەوە بمانخوات. ئەم تابلۆیە لە یابان زۆر بەناو
بانگە و لە زۆربەی گۆڤارە هونەریە بەناوبانگەكاندا بڵاوبۆتەوە، نرخی خەیاڵیان داوە
پێم تاكو بیفرۆشم بەڵام نەمفرۆشتووە و هەردەم لەگەڵ خۆمدا دەیبەم، وەك ئاوێنەیەك
وایە خۆمی تیا دەبینم لە نەوەدەكاندا.
سۆران ئازاد: دەكرێت زیاتر بتانناسین؟
سمكۆ ئەحمەد: من سمكۆ ئەحمەد لەساڵی 1970 لە سلێمانی لەدایكبووم، لەساڵی 1996
لەسەرەتایی كاری هونەریم رومكردە وڵاتی ژاپۆن و لەوێ نیشتەجێی بووم، خاوەن
بروانامەی "ماجستر لە‌بواری ئە‌ندازیاری و مەدەنی زانكۆی تۆكیۆ" و "دبلۆما لە
جاپۆنۆلۆجی لە پە‌یمانگای تۆكیۆ بۆ زمان" و "دبلۆما لە هونەری كالیگرافی یابانی
لەپە‌یمانگای هونەری MIFA لە تۆكیۆ" و "بەكالۆریۆس لە‌بواری ئە‌ندازیاری مەدەنی
لە‌زانكۆی سە‌ڵاحە‌دین"م. جگە لە‌مە ئە‌ندامی "دە‌ستە‌ی هونەری جالا لە ژاپۆن،
لێپرسراوی بەشی شەرقلئە‌وسە‌ت و ئەمەریكای لاتین، بۆ (جالا بیناڵی) لەهۆڵی
میترۆپۆلیتان لە تۆكیۆ" و دامە‌زرێنە‌ری "چیرمانی كۆمە‌ڵە‌ی هونەری باران"م.
سۆران ئازاد: خاوەن چەند پێشەنگای تایبەتی خۆتی؟ لەچەند پێشەنگای جیهانی بەشداریت
كردووە؟
سمكۆ ئەحمەد: خاوەن زیاتر لە 20 پێشەنگای تایبەتی خۆمم لە وڵاتانی "ژاپۆن،
كۆریا، هۆڵە‌ندا، كوردستان، سیرالیۆن، افغانستان" و بەشداریم كردوە لەزیاتر 50
پێشەنگای جیهانی لە "ئاسیا، ئەفریقا، كە‌نە‌دا، ئە‌مە‌ریكا"، وە بەشداری
هە‌میشە‌یی فیستیڤاڵی "جالا"م لە هۆڵی تۆكیۆ میترۆپۆلیتانە و بە‌شداربووی كوردم
لە "كۆئانجو بیناڵی" لە كۆریای باشور
سۆران ئازاد: سوپاس بۆ ئەم گفتووگۆیە و دوا پەیام و بەرنامەی داهاتووت چییە؟
سمكۆ ئەحمەد: پەیامم؟ هیوادارم نموونەتان زیاتر بێت و ژور نالیستی مۆدێرن و دوور لە
ختوەكە سیاسیەكان لە كوردستاندا گەشە بكات كاتێك باش لە هونەر دەكرێت، تەنها هونەر
بكرێتە پێوەر و كاتێك باس لە نوسین دەكەن تەنها ئەدەب حاكم بێت. هیوادارم
لەكوردستاندا بایەخ بە هونەر و هونەرمەندان بدرێت بێجیاوازیی.
لەبارەی چالاكیی ئایندەم، ئێستا سەرقاڵی رێكخستنی جالا بیناڵم" یابان، ئاسیا،
ئەفریقا، ئەمەریكای لاتین، ئەمەریكای ئارت و ئەسۆشیسشین" لە هۆڵی میترۆپۆلیتان لە
تۆكیۆ، دەبێت جگە لە كارەكانی خۆم كاری 30 هونەرمەندی كورد و ئەمەریكای لاتین
هەڵبژێرم تا بەشدار بن تێیدا. هەروەها لە لەندەن سەرقاڵی پێشنەگایەكی تایبەتی خۆمم،
جارێ بریاری كات و شوێنم نەداوە.
سوپاس كاك سۆران، سڵاوم بۆ كاك كاروان.
بابەتەکە وەک
بڵاوکراوەتەوە بە پی دی ئێف