هه‌نووکه‌ من

 غه‌ورم 

له‌ خه‌رمه‌نی باران و دڵۆپه‌دا !

غه‌ورم

له‌ نێو گه‌ڵا و

قه‌ومه‌ زه‌رده‌کانی پایزدا

غه‌وری ڕه‌نگم و

له‌ ڕاکشانی بارانێ وێڵم

له‌ئه‌نگۆره‌ی ئێواره‌یه‌ک ده‌گه‌ڕێم

بایه‌ک هه‌ڵکا و

له‌ چیمه‌نی ئه‌م سوبحه‌ دا

دڵۆپه‌یه‌کی عه‌یار بمفڕێنێ و

بمدا به‌ بێستوونی شه‌به‌قێکدا

لێ شه‌به‌قێ

 وه‌ک سه‌رسنگی کچه‌کانی ووڵات

ژیان له‌ باران و ، مردن له‌ باران و

هه‌وام له‌ باران  پێ به‌خشێ !

وه‌ره‌ ئه‌ی یار

با به‌رقاپی ، له‌و هه‌ساره‌ خومارانه‌‌ بگرین

له‌و تریفانه ‌بنۆڕین

له‌ عاشورای زه‌مانێکدا

زنجیر له‌ پشتی نێرگز ده‌ده‌ن و

سه‌ر بۆ خوێن و

سه‌ر بۆ عه‌یام

سه‌ر بۆ دۆڕانی عیشق نه‌وی ناکه‌ن !

وه‌ره‌ ئه‌ی یار

 تۆ بارانت به‌و گوڵانه‌ به‌خشه

‌له‌ خوێندنه‌وه‌ی باران و شیعر تێر نابن

له‌ خوێندنه‌وه‌ی دڵ شکانی په‌نجه‌ره‌کان تێر نابن

له‌ خوێندنه‌وه‌ی ته‌پ وتۆزی سواره سپیه‌کان تێر نابن 

له‌ خوێندنه‌وه‌ و

 له‌ مێژوونامه‌ی جریوه‌ وه‌ڕس نابن !

وه‌ره‌ ئه‌ی یار

هه‌تا هاوسێی ئه‌م پایزه‌ین

با به‌ کۆتابێ ئه‌م جه‌نگه‌

من نیشتیمانی ئه‌م سه‌ره‌ بچکۆله‌ی خۆم

به‌ یه‌ک نمه‌ ئاونگی له‌شت ده‌به‌خشم و

هه‌موو عومرم له‌ هه‌ڵاژانێکدا هه‌ڕاج ده‌که‌م

هه‌ڵاژانێ ، ئاشت بوونه‌وه‌ی جه‌ننه‌ت وجه‌هه‌نه‌م بێ

هه‌ڵاژانێ ،هه‌مووگیانمان پڕکات له‌ خوڕه‌می سێوه‌کان

هه‌ڵاژانێ به‌ هه‌ڵاژانی باران چێ

ووتت چی ئه‌ی یار ، وه‌ره‌ با ئاشت بینه‌وه‌

با بۆ ئه‌به‌دییه‌ت ، دییه‌مان

له‌ ته‌واشای و‌ێنه‌کاندا وورد که‌ینه‌وه‌

وه‌ره‌ ئه‌ی یار خوڕه‌مت بێ و

ڕه‌حمی شعرێ له‌ دڵتا بێ !

زستانی   2005ئه‌ڵمانیا