تشرینی دووەم 2009
شەو سێبەرێكی تەڕە
مانگ دەیچنێ
سپێدە وشكی دەكاتەوە.
++
مانگ بە دەنووك
شەو دەنووسێتەوە
بە خەیاڵ دوارۆژ.
++
خەیاڵی شەو ڕەش دەچێتەوە
وەك ئەوەی لە پرسەی خۆر
بیركردنەوەی جێ هێشتبێ.
++
بەبیركردنەوە
بە شەودا دەڕۆم
بەجەستە
سەما لەگەڵ “با” دەكەم
ئەوە من نیم
بێدەنگی هەتاوە
كاتێ قسە لەگەڵ خۆی دەكا.
++
مانگ چرای شەو
بە دواماچی رۆژ هەڵدەكا.
++
مانگ رووتی لە ئاو جێ هێشت
دەنگی لە هەتاو
ئەوەی بە نەبینراوی دەشكێ
ئەدرێسی شەوە
بە پێوانەی بەفر.
++
چۆلەكەیەك لەبەر مانگەشەو نووستووە
خەیاڵی هەتاو دەكا.
++
بەنیگای شەو
حیكایەتی زەوی
بەخۆر وەدەكەم.
++
دنیا بەقسەی “با” دێتە سەما
بەپڕشنگی خۆر بیر دەكاتەوە
لە رووتی مانگ جێ دەمێنێ.
++
پرسیاری ژیان هەمیشە لە بارانەوەیە
وەڵامەكان لە خۆرئاوابوون.
++
لەنێوان بوون و نەبوون
“با” بەخەیاڵی باران دەجوڵێ
لە نێوان شەو و رۆژ
باران بە “با” سەوز دەبێ.
++
ئەوە باران نییە
ئاسمان، زەوی پێ دەشوا
حەزی مانگە
لە كتێبی شەو نووسراوە.
++
هەتا شەو بمێنێ
مانگ لە پەڕی ئاسمانە
هەتا خۆر هەڵدێ
مرۆڤ لەباران دێتەوە.
++