دیوانی سه‌لام محه‌مه‌د

ئێستا له‌ کتێبخانه‌کاندایه له‌ به‌رگ و چاپێکی قه‌شه‌نگدا‌


عیسام بینی چڵێ ئاگری بۆ هێنام
هه‌واڵی زه‌وی لێپرسیم
وتم: زه‌وی؟
یا سێداره‌و زیندان و ئه‌تۆم و دڵه‌ نه‌گریسه‌كان
كاكه‌ عیسا
ده‌ستم بگره‌و بمگه‌یه‌نه‌ ((حوزووری خوا ))
من له‌و زه‌وییه‌ بێزارم
من نامه‌وێ جارێكی تر بۆ سه‌ر زه‌وی بگه‌ڕێمه‌وه‌
كۆپله‌یه‌ك له‌شیعری (شاری نهێنی) له‌كتێبی (ده‌مه‌و ئێواران ئه‌تبینم به‌سوخمه‌یه‌كی زه‌رده‌وه‌) ساڵی نووسینی ئه‌م شیعره‌ 1975.

ئه‌گه‌ر بمانه‌وێت بگه‌ڕێینه‌وه‌ بۆ سالانی حه‌فتای شیعری كوردی به‌هیچ شێوه‌یه‌ك ناتوانین باز به‌سه‌ر ناوی سه‌لام محه‌مه‌د-دا بده‌ین، چونكه‌ یه‌كێك بوو له‌ده‌نگه‌ دیارو یاخی و زولاڵه‌كانی شیعری كوردی ئه‌و سه‌رده‌مه‌و هه‌ر زوو توانیوێتی به‌بلاوكردنه‌وه‌ی شیعره‌كانی و به‌شداریكردنی له‌هه‌موو كۆڕه‌ شیعرییه‌كانی كه‌ركوك و ناو به‌ناویش له‌كۆڕه‌ ئه‌ده‌بیه‌كانی به‌غداو سلێمانی‌و هه‌ولێر خوێنه‌رێكی زۆر له‌ده‌وری خۆی كۆبكاته‌وه‌. وه‌ك له‌پێشه‌كی دیوانه‌ چاپكراوه‌كه‌یدا ئاماژه‌ی بۆ كراوه‌، تاساڵی 1988 نه‌یتوانیوه‌ هیچ كۆمه‌ڵه‌ شیعرێك چاپ بكات، به‌لام به‌ده‌رچوونی كتێبی (ده‌مه‌و ئێواران ئه‌تبینم به‌سوخمه‌یه‌كی زه‌رده‌وه‌) له‌و ساڵه‌دا كه‌ ته‌نها بریتی بوو له‌به‌شێكی كه‌می شیعره‌ بلاوكراوه‌كانی تایبه‌تمه‌ندی خۆی راگه‌یاندو له‌یاده‌وه‌ری خوێنه‌ری شیعری كوردیدا مایه‌وه‌. هه‌ر چه‌نده‌ دوای گیرسانه‌وه‌ی له‌مه‌نفا له‌ساڵی 1991-دا بێده‌نگی هه‌ڵبژاردووه‌و هیچ به‌رهه‌م و كتێبێكیم نه‌كه‌وتۆته‌ به‌رچاو، به‌لام له‌م نزیكانه‌دا چه‌ند شیعرێكی تازه‌ی بلاوكرده‌وه‌. ‌ سالانێك سه‌لام محه‌مه‌د ده‌نگێكی دره‌وشاوه‌ی شیعری كوردی بوو، چونكه‌  نه‌ك ته‌نها شاعیرێكی دیار بوو، به‌ڵكو له‌باره‌ی شیعره‌وه‌ تێڕامان و خوێندنه‌وه‌ی تایبه‌تی هه‌بوو. له‌دوای راپه‌ڕینه‌وه‌ هیچ ده‌زگایه‌كی راگه‌یاندن و رۆشنبیریی بیریان له‌چاپكردنه‌وه‌ی ده‌مه‌و ئێواران نه‌كردۆته‌وه‌، هه‌رچه‌نده‌ شه‌یدایانی شیعری سه‌لام محه‌مه‌د زۆر تاقیبی ده‌كه‌ن. هه‌روه‌ها به‌هیچ جۆرێك له‌لایه‌ن هیچ ده‌زگایه‌كی رۆشنبیرییه‌وه‌ بۆ هیچ چالاكی و كۆڕو فێستیڤاڵێك رووی لێ نه‌نراوه‌، له‌كاتێكدا ده‌بینین خه‌ڵكانێك كه‌ هیچ هونه‌رێكیان پێ نییه‌ داوه‌تی كوردستان ده‌كرێنه‌وه‌و چه‌ندین به‌رنامه‌ی تیڤی و كۆڕوكۆبوونه‌وه‌یان بۆ سازده‌كه‌ن، كه‌چی سه‌لام محه‌مه‌دو دیوانه‌كه‌ی ته‌واو له‌بیركرابوو تا به‌هه‌وڵ و کۆشی گۆڤاری هه‌نار توانرا له‌ به‌رگێکی جواندا کۆی شیعره‌کانی له‌ژێر ناوی ( دیوانی سه‌لام محه‌مه‌د ) دا به‌چاپبگه‌یه‌نێت  ئه‌م دیوانه‌ی ئێستای به‌شێکی زۆری شیعره‌کانێتی که‌ پێشتر به‌ناوی ( ده‌مه‌وئێواران ده‌تبینم به‌سوخمه‌یه‌کی زه‌رده‌وه‌) له‌ساڵی 1988 بڵاوکرابووه‌و به‌ڵام ئێستا کۆمه‌ڵێک شیعری تازه‌و کۆنی له‌م دیوانه‌دا هه‌ن که‌ پێشتر له‌ کتێبی  ده‌مه‌وئێواران ده‌تبینم به‌سوخمه‌یه‌کی زه‌رده‌وه‌)نه‌بوون له‌گه‌ڵ یه‌ک دوو نووسین و دیدارێکی تێروته‌سه‌ل که‌ له‌گه‌ڵ ئه‌ودا دا سازکراوه‌ و قسه‌ له‌ ئه‌زموونی شیعریی و ژیانی خۆی ده‌کات . لێره‌دا ده‌ڵێم: هه‌موومان ده‌زانین هه‌رچی ده‌زگای به‌ناو رۆشنبیری كوردییه‌ له‌لایه‌ن ده‌سته‌و تاقمێكه‌وه‌ داگیركراون و به‌ئاره‌زووی خۆیان به‌كاریده‌هێنن، به‌لام ئه‌گه‌ر كورد ره‌خنه‌یه‌كی به‌رچاو روون و دروست و ده‌قناسی هه‌یه‌ بۆ ده‌بێت هیچ قسه‌یه‌كی جیدی له‌سه‌ر شیعره‌كانی سه‌لام محه‌مه‌د نه‌كات؟ به‌داخه‌وه‌ ره‌خنه‌ی كوردی هێشتا له‌هاوڕێیه‌تی و شارچێتی و حیزبچێتی و چێتییه‌كانی تر دوورنه‌كه‌وتۆته‌وه‌، له‌ماوه‌ی سیی ساڵدا ئه‌مه‌ یه‌كه‌مین ئاوڕدانه‌وه‌یه‌ له‌ سه‌لام محه‌مه‌د  که‌ گۆڤاری هه‌نار توانیوێتی دیوانه‌که‌ی بۆ چاپبکات ، لێره‌دا به‌دڵ پیرۆزبایی له‌کاک سه‌لام ده‌که‌م هیوادارم به‌رده‌وامبێت و جێگای خۆیه‌تی ده‌ستخۆشی له‌ گۆڤاری هه‌ناربکرێت که‌ به‌حه‌ق کارێکی گه‌ڵێک باشیان کردووه‌و به‌چاپکردنی ئه‌م دیوانه‌ سه‌لماندیان که‌ یه‌کێکن له‌و گۆڤارو ده‌زگایانه‌ی به‌ جوانی کارده‌که‌ن و خه‌می ئه‌وه‌یانه‌ خزمه‌تی ئه‌و قه‌ڵه‌مانه‌ بکه‌ن که‌ رۆژگارێک ده‌نگێك بوون و خزمه‌تی شیعرو وشه‌ی کوردیان کردووه‌، خوێنه‌ری به‌رێز ئه‌مه‌ی من لێره‌دا نووسیومه‌ هیچ نییه‌ ته‌نها بۆئه‌وه‌یه‌ ئه‌م دیوانه‌ بخه‌مه‌ ڕوو و و مژده‌ به‌ خوێنه‌رانی ئه‌م شاعیره‌ بده‌م که‌ ئێستا دیوانه‌که‌ی له‌ بازاردایه‌ و ساڵانێکه‌ هیچ ئاوڕێکی لێنه‌دراوه‌ته‌وه‌، نامه‌وێت لێره‌دا هیچ قسه‌یه‌ک یان خوێندنه‌وه‌یه‌ک بۆ شیعره‌کانی ئه‌م شاعیره‌ بکه‌م چونکه‌ نه‌ له‌نووسینێکی ئاوا کورتدا  ئه‌وه‌ده‌کرێت و نه‌ من ره‌خنه‌گرم و نه‌ شیعری سه‌لام محه‌مه‌د پێویستی به‌ ستایش هه‌یه‌، ته‌نها ئه‌وه‌ ده‌ڵێم ؛ هیوادارم چ خوێنه‌ران و ج ره‌خنه‌گران  دیوانه‌که‌ به‌ بێده‌نگی نه‌سپێرن و دوای خوێندنه‌وه‌ ، خوێندنه‌وه‌ی جددی بۆ بکه‌ن که‌ له‌ ئاستی شیعره‌کاندابێت. 

سوید