پایز ، وەرزی گەڕانەوەی ژەنەڕاڵ !

بۆ هاوڕێم : محەمەد عومەر عوسمان – ی شاعیر
 
"ئەی دەشتەکیی ! 
زۆر دەترسم ، تۆ هەرگیز نەگەیتە 'کەعبە' .
چونکە ئەم ڕێیەی گرتووتە 
دەچێتەوە سەر 'تورکستان' !" 
- موسڵیحوددینی سەعدی – (بێستانی گوڵەکان) 
 
 
پایز ، کە لە دەرگا ئەدات ،
"موحەممەد" پێی دەڵێ :
کراسی گەڵاکانت بە ڕۆحما هەڵواسە و 
بە ڕووتیی وەرە ژوورەوە !

***

پایز ، کە ڕێگەی ماڵەوە  ون دەکات
خۆی دەکات بە کوخە سپییەکەی 'موحەممەد' دا !

***

پایز ، کە لەگەڵ 'موحەممەد' دەچێتە پیاسە ؛ 
پێکەوە دەستی باران دەگرن و 
لە سارای کۆچدا  ون دەبن !

***

 پایز ، کە دەچێتە بازاڕ 
لەگەڵ کڕینی هەندێ هەور و ڕەشەبا  
چەتری شیعرێکیش بۆ 'مەحەممەد' دەکڕێت ! 

***

پایز ، کە لەسەر درەختەکانی باخی گشتیی هەڵدەنیشێ ،
 'موحەممەد' ، منداڵ منداڵ دەبێتەوە و 
لە حیکاتەکانی دایکیا بەدەم گۆرانییەوە ، - ئاو - دەنووسێتەوە :   
"پایزێ ، باری کرد ، کەس نەیگێڕاوە
بۆ خۆم دڵی تەنیایی و شیعری خۆم داوە !"  
 

***

ئەی موحەممەد !
لە پایزەوە هەتاکو شەراب 
عومرێکە من بەڕێوەم بگەمە کەعبەی دڵ !
لە تەمی غوربەتەکەی تۆدا ون دەبم و 
کەچی هەرگیز ناگەمە ئەوێ .  
ئەی موحەممەد !
چاوەڕێم بە ، هەتا لە مردن دێمەوە .
سیگاری شیعرێک و 
چاکەتە بۆرەکەی خۆتم بدەرێ ، 
ئەی 'موحەممەد' ، ئەی خۆری من ! 
-------------------------------------------- سێپتامبەری 2018 – ئەدیلاید---