کۆست

ئای چ ڕۆژێکی شوم و غەمناکە!..
کە خۆر خنکاوە لە تەم و مژا
شاعیرێ بە دیار تەرمی خۆرەوە..
ئەگری و زستانی هاتووە بە گژا

*

ئاگری سینەش بوو بە خۆڵەمێش..
دڵی وێرانەم ئێستا سارد و سڕ
لە زستانێکدا چۆن بوو بە هەڵم..
ڕۆژێ لێوان لێو لە بڵێسە و گڕ؟

*

کوا ئەو ڕۆژانەی کە گەڵای نیگای..
بۆ جەستەی سڕی من دائەباری؟
بۆ منی خەستە دوو باخی نیگای..
گەڵای فرمێسکی ئەکردە دیاریی

*

ڕووداوی هه‌ردوو دیوی په‌نجه‌ره‌که‌

له‌ودیو په‌نجه‌ره‌ی ته‌زیوی زستانه‌وه‌..
دوو چاوی گه‌شی پڕ ئه‌شک و نزا..
به‌ده‌م شه‌پۆلی گل و ژانه‌وه‌
تک.. تک.. ون ئه‌بێ..
له‌ تاریکیی و ته‌م و مژا.. ده‌توێته‌وه‌
تا ساتێ زووتر.. خوا تابووتی شه‌و..
له‌ دارستانی به‌ره‌به‌یانا.. بشارێته‌وه‌
که‌چی تادێ شه‌و سامناکتر ئه‌بێ..
خوا ناڕوانێته‌ سیمای پشتی ئه‌و په‌نجه‌ره‌ ڕه‌شه‌..
که‌ مرۆڤێکی ته‌نیای کڵۆڵه‌
پێخه‌فی هه‌ور و سه‌رینی خۆڵه‌
ئه‌گری و ئه‌پرسێ..
مه‌گه‌ر به‌ تیشکی زه‌رده‌ی مه‌رگی خۆم..
سه‌هۆڵ به‌ندانی شه‌و بتوێته‌وه‌!

یه‌سه‌نین*

ڕێبوارێ بووم و
هه‌ورێ نه‌گریا به‌سه‌ر باڵاما..
تۆزی غه‌ریبیی به‌رگی به‌رم بوو
ڕێبوارێ بووم و
هه‌ورێ نه‌گریا به‌سه‌ر باڵاما
سه‌رابێکی دوور ڕێ‌ی سه‌فه‌رم بوو
*
که‌وتمه‌ دوای تیشکی دووچاوی شۆخێ..
دڵم هه‌ڵوه‌ری له‌ له‌پی ده‌ستیا..
بووم به‌ گه‌ڵایه‌ک له‌ ناو شه‌پۆل و
گێژاوی هه‌ستیا
*
که‌ هاتیشمه‌ شار ئه‌ستێره‌ی به‌ختم..
له‌ ته‌م و مژا ڕۆیی ئاوا بوو
دنیای هه‌ستی من بوو به‌ که‌لاوه‌..
تا ڕۆژانێ بوو به‌هه‌شتی خوا بوو
*
ئای.. چه‌ند سه‌رم کرد به‌ مه‌یخانه‌دا..

شەوی پایز

ئەمشەو خەڵکی شار پەنجەرەکانیان خڕ داخستووە..
تەنیا من نەبێ پەنجەرەکەمم خستۆتە سەر پشت
کێ وەک من پێکی لە غەمی گەڵای زەرد لێوڕێژ ئەکا؟..
هاکا بە باڵای دارێکی ڕووتا.. خوێنی خۆمم ڕشت

*

لق و چڵەکان بوونە هەزاران دەستی پڕ نزا و
(با) تەرمی ملیار گەڵای شەهیدی داوە بە کۆڵا
ئەفسوس گەڵاکان ئەکەونە ژێر پێ..
سەرگەردان ئەبن لە گەرد و خۆڵا

*

ئەمشەو گەڵاکان پەروانەی مردوون..
ناچنە دیداری چرا و گڕی مۆم
ئەمشەو گەڵاکان ماسی مۆمیان و
شاد نابنەوە بە ڕوبار و چۆم

*

ئێواره‌ی پایز

ئێواره‌یه‌ و
گڤه‌ی (با) دێ..
هه‌ور ئاسمانی گرتووه‌
ئێواره‌یه‌ و
داری پایز ئاهه‌نگی مردن ئه‌گێڕێ..
گه‌ڵا سه‌رچۆپیی گرتووه‌

*

ئێواره‌یه‌ و
منی ته‌نیا له‌ناو کۆمه‌ڵێ تارمایی ڕێبوارانا..
له‌ سه‌رمانا.. ئه‌له‌رزم و
هه‌نگاو ئه‌نێم به‌ ژێر باڵی ڕه‌هێڵه‌ و شه‌سته‌بارانا

*

ئێواره‌یه‌ و
منی بێ پاڵتۆ.. بێ چه‌تر..
ده‌ربه‌ستی تۆف و سه‌رما نیم
ئێواره‌یه‌ و
که‌س بۆ خه‌می من ناسوتێ..
ئای له‌و ڕۆژه‌ ڕه‌شانه‌ی دیم!

*

با

نیوه‌شه‌وێکی سارد و غه‌مناکه‌..
پایز میوانه‌ له‌ ژووره‌که‌ما
هه‌ناسه‌ی ساردم ئه‌بێته‌ ئه‌شک و
دێته‌ خواره‌وه‌ به‌ باڵای ڕه‌شی په‌نجه‌ره‌که‌ما

*

هاوار و هاژه‌ی چه‌می ناڵینێک..
ئه‌ڕژێته‌ گۆمی مه‌نگی دڵه‌وه‌
ئارام و ئۆقره‌ له‌ گیانم ئه‌بڕێ..
وه‌ك گه‌ڵای پایز به‌ده‌م چڵه‌وه‌

*

هاوار و هاژه‌ی چه‌می ناڵینێک..
دێته‌ گوێم ئه‌ڵێ‌ی ئاوازی تاره‌
نازانم کێ‌یه‌ به‌م نیوه‌شه‌وه ‌تار ئه‌ژه‌نێت و
که‌شتی ئارامی کۆیله‌ی شه‌پۆلی ده‌ریای ئازاره‌؟

*

خۆکوشتن

(- ئای.. که‌ی بێ چه‌قۆی ژێر سه‌رینه‌که‌ت..
له‌ قوڵپی خوێنتا گه‌رم بێته‌وه‌؟
یان مردن بمرێ و له‌ ژووره‌که‌تا..
هه‌وری خۆکوشتن بڕه‌وێته‌وه‌؟)

*

هانا

ئێستا.. منی ون له‌ ته‌مومژی ڕه‌شی غوربه‌تا
گه‌ڵای دره‌ختی گیانم هه‌ڵوه‌ری..
له‌ ناو بڵێسه‌ و گڕی مه‌ینه‌تا

*

ده‌توخوا وه‌ره‌..
بیابانی دڵم.. تینوی کانیاو - شەیدای سێبه‌ره‌
ده‌توخوا وه‌ره‌..
با سه‌رابه‌کان ببن به‌ شه‌تاو
دره‌خت سه‌ر بکا به‌کۆشی هه‌ورا..
هاژه‌ بێته‌وه‌ ناو چه‌می سوتاو

*

ئه‌ترسم دڵ ببێته‌ پارچه‌یه‌ک سه‌هۆڵ

تۆ خۆتم لێ مه‌شاره‌وه‌
ئه‌ترسم دڵ ببێته‌ پارچه‌یه‌ک سه‌هۆڵ..
به‌ده‌م کزه‌ی ئێواره‌وه‌

*

تۆ خۆتم لێ مه‌شاره‌وه‌
من له‌ گه‌ڵای زه‌ردی پایز..
زۆر بێ نه‌وا و غه‌ریبترم
له‌ کزه‌با ته‌زیوترم

*

تۆ خۆتم لێ مه‌شاره‌وه‌
بیرته‌ به‌ زه‌رده‌ی ڕوانینه‌کانت..
هه‌ڵمت له‌ به‌فری دڵم هه‌ڵسان و
منت خسته‌ شوێن ساماڵی گیانت؟

*

ئەشکی ئێواره

له‌گه‌ڵ هه‌نسک و گریانی..
هه‌وری خوێنینی ئێواره‌
به‌کوڵ گریا.. فرمێسکی ڕشت..
ئه‌م دڵه‌ پڕ له‌پرسیاره‌

*

وتم.. ئای ڕه‌نگه‌ هه‌وره‌کان له‌تاو..
ئازاری قامچی بروسکه‌کان بێ..
به‌خوڕ دابکه‌ن؟
یان بۆ دیمه‌نی پڕ ماته‌مینیی گه‌ڵا مردووه‌کان..
شین و زار بکه‌ن؟
یان بۆیە ئاسمان وا بە کوڵ گریا..
چونکە گوڵی هەور لە وەرینایە و
دەستی بەربووە لە چڵی دەریا!

*