دیارم دەیری عیشقە، جێ بە سووتن بێ لەوێ دەگرم
كە من مشتێ چڵ و چێوم، بە چی بم، كەڵكی كێ دەگرم!
![](http://www.hemin.dk/files/images/tp.gif)
نەگەییە دامەنی دەستی دوعا، جا دەبمە خاكی ڕێی
طەریقەی گۆشەگیریی بەردەدەم، ئەم جارە ڕێ دەگرم
![](http://www.hemin.dk/files/images/tp.gif)
كە دادی یەئسی خۆمم بردە لا، ئەم عارفە توند بوو
وتی ئاخر سبەینێ چەژنە، خوێنی تۆ لە پێ دەگرم
![](http://www.hemin.dk/files/images/tp.gif)
لە ڕووسووری عیبادەت لام و ڕووزەردی خەجاڵەت مام
بە ناوی سێوی ناوم باغەوان و، من بەهێ دەگرم
![](http://www.hemin.dk/files/images/tp.gif)
لەسەرخۆچوونە، شەیدابوونە، قوڕپێوانە، سووتانە
هەتا مردن، مەحەببەت ئیشی زۆرە، ڕیزی لێ دەگرم
![](http://www.hemin.dk/files/images/tp.gif)
ج شۆخە ئاگرم تێ بەردەدات و پێم دەڵێ: یاشێخ!
بە خاشاكی دەوت شوعلە، عەصامە، دەستی پێ دەگرم
![](http://www.hemin.dk/files/images/tp.gif)
كە سینەی ڕێشمی بەو تیغی نازە ئەنجن ئەنجن كرد
وتی: پەژمووردەیە ئەم لالەزاره، ئاوی تێ دەگرم
![](http://www.hemin.dk/files/images/tp.gif)
لە پاداشتی قسەی سەردا هەمە ئاه و هەناسەی گەرم
كەسێ شێتانە بەردم تێ گرێ، من بەرقی تێ دەگرم
![](http://www.hemin.dk/files/images/tp.gif)
شوكور هۆشیارە (محوی)، تێ دەگا دنیا خەراباتە
كە بەدمەستیی بكا ئەهلی، خراپەی بۆچی لێ دەگرم!