...
...
من ناوم خەونە
خەڵکی وڵاتی ئەفسوونم.
باوکم شاخە و
دایکم تەمە.
من لە ساڵیکی مانگ کوژراو و لە مانگێکی هەفتە کوژراو و
لە ڕۆژێکی سەعات کوژراودا
دوای شەوێکی ئاوس بە 'با'
دوای شەوێکی پشت کۆماوەی هەوراز بە کۆڵ
بەرەبەیانێکی زامدار
لە شەفەقێکی کەسکەوە
وەک گزنگێکی خوێناویی کەوتمە خوارێ و
داگیرسام و بووم بە مۆمێک
گڕ بە مل و
بووم بە پرسێک
دەم بە هاوار.
 
تۆ لە گەڕەکی گاوراندا بووی بە تۆو و لە دایک بووی.
ژنە دیانێکی هاوسێ، مریەمێکی گوڵەهێرۆی،
ڕواو لە ناو تاریکییدا، گەنم ڕەنگێ وەکوو گۆیژە،
ناوکی بڕیت. هێشتا لە ناو کاسەدا بووی،
مریەم بە کڵۆ خەڵووزێ، لەسەر تەختی نێوچەوانت،
وێنەی صەلیبێکی کێشا و تاجەدڕکی کردە سەرت و
لە باوەشی نامۆیی خۆی و عیسادا، وەک کارژۆڵەیەکی تازەزاو،
ماچی کردی و هەڵی گرتیت. ژنە دیانێکی هاوسێ
نەفرەتێکی ناو شارەکەت، چارۆکەی یەکەم قوماتەی
ئەم سەفەرە و یەکەم خاچی ئەم ژیانەی بە تۆ بەخشیی.
...
...
من خاچی مار تێ ئاڵاوم
من ڕێی وێڵ و
گەشانەوەی هەڵوەرین و
ئاوابوونی هەڵهاتن و
شەوقانەوەی کوژانەوە و
نیوەشەوی نیوەڕوان و
شەوەزەنگی بەیانیانم
...
...
ئەوین چییە؟! ڕۆحی شەوە؟! ڕۆحی ڕۆژە؟! ڕۆحی خاکە؟!
هێزێکی تری سرووشتە وەکوو ئاو و
وەکوو هەوا و وەکوو مردن؟!
یان هەر کڵپەی ئارەزووە
کە هەڵ بوو.. دامرکێتەوە؟!
ئەوین چییە؟! دژەمەرگە؟!
دژە وەڕسبوونی لەشە؟!
نوێبوونەوەی بەردەوامە؟! یان وەرزێکی تری جەستە و
یاخود دەست و پەنجەی خوایە؟!
یان سەرچاوەی خوێنی شیعرە و وشک نابێ و دوایی نایە؟!
ئەوین چییە؟! ژیانە و تێکەڵی مەرگە؟!
ئاگرە و تێکەڵی ئاوە؟!
زەنگی ڕەنگە؟!
بۆنی دەنگە؟!
وڵاتی بیرنەچوونەوەی خەونە؟!
هزرە کە وەختێ کوێر دەبێ؟!
هۆشە کە بێ هۆش دەکەوێ؟!
ئەوین چییە؟! تەزوویەکە دێت و دەڕوا و ئاوا ئەبێ؟!
سڕبوونێکی تەماشایە و بە سحری هێزێکی نادیار؟!
چەخماخەیە لە ناو دڵدا؟!
تۆفانێکە لە ناو سەردا؟!
ئەوین چییە؟! من نازانم ئەوین چییە؟!
بەڵام کە دێت، بە دوو باڵی گڕ و بارانەوە دێت و
لەملاوە ئەمکا بە سووتوو
لەولاوە نوێم ئەکاتەوە.
 
 
تۆ خاچی مار تێ ئاڵاوی
تۆ سۆراخی ئۆقرەی سەر ئاگری بوونی و
تۆ باڵی فڕینی ئاوی.
تۆ هەناسەی لە نیشتمانی تاساودا و
دڵۆپێکی لەو وشانەی
کە لە چاوی نامۆییدا
قەتیس ماوی!

...
...

لەم مێژووە زڕەدا خۆم و خۆم تیغین و نێزەین و
ئەچینە ناو جەستەی یەکەوە. خۆم و خۆم
بڕبەندین لە قەدی یەکتردا. خۆم و خۆم
گابەردین تل ئەدەین، دێینە خوار هەر
بەسەر یەکتردا. خۆم و خۆم گوێزانین ڕائەکەین
بە جەرگی یەکتردا.
خۆم و خۆم تاوان و شایەتین پێکەوە.
خۆم و خۆم سێدارە و جەللادین پێکەوە.
 
ئازادیی! کامەیە ئازادیی؟!
ئازادیی ئەسپێکی شەکەتە و ئەشەلێ و
هەموو ڕۆژ بار ئەکرێ لە فیشەک!
نیشتمان! کامەیە نیشتمان؟!
ئەو عەردەی هەموو ڕۆژ دوو سێ جار ئەیکوژین؟!
ئەو دەشتەی کە بۆتە تاتەشۆر!
ئەو شاخەی کە بۆتە دارەمەیت!
ئەو بەرد و ئەو قوڕ و ئەو چەو و ئەو لمەی
زیندانی لێ زاوە؟!

 

کامەیە نیشتمان؟! کامەیە ئازادیی؟! نازانم..
ئەو ئاوەی بە ڕۆژی نیوەڕۆ سەرچاوەی ئەدزین؟!
ئەو یارەی لە خەودا چاوانی ئەدزین؟!
ئەو هەورەی پێش باران بارانی ئەدزین؟!
ئەو مانگەی لە شەوی چواردەدا ئەیدزین؟!
نازانم کامەیە نیشتمان؟! کامەیە ئازادیی؟!
ئازادیی ئەسپێکی شەکەتە و ئەشەلێ و
هەموو ڕۆژ بار ئەکرێ لە فیشەک
ئەوەتا نیشتمان گەراجە بۆ تایەی قاچاغ و
لۆرییە بۆ درۆی سەرمۆر و
گومرگە بۆ خوێن و بۆ خەم و جگەرەی ستۆک و
دروشمی ستۆک و .. بازاڕە بۆ سیمای سیاسیی مووزەوەر!
لەم مێژووە زڕەدا.. هەر دۆزەخ ئەزێت و
هەر شمشێر سک ئەکا و
مەرگەوەڕ ئەبێتە پێغەمبەر!

 

هەمدیسان وا مارتە و ئێوارەی بارانە و
غەریبیم تەپ و نم ئەبارێ. هەمدیسان وا مارتە و
تاو تاوی ڕێژنەی زامانە وسەفەری درێژی
باڕێزەی گریانە و غەریبیم شەست ئەکات.
هەمدیسان ئێوارەی بارانە و من ئێستە لە گۆشەی
تەریک و شینباوی گازینۆی غەریبان دانیشتووم.
ئەوەندەی کوردستان تەنیام و ئەوەندەی شاخ و داخ
ماندووم و ئەوەندەی دووکەڵی جگەرەم پەرتم و
ئەوەندەی دواچۆڕی ڕووباری ئەم شیعرە لێڵم و
ڕۆحیشم کوولەکەی تەمێکە و خەریکە تەق ئەکات.
 
هەمدیسان بارانە و ئێوارەی بارانە و چون
قەوزە وەنەوزێ گرتوومی.. نازانم بۆ مەرگە؟!
یان خەونی کازیوە و چوونەوە بۆ هۆبەی چاوانی
یارانە.. بارانە و بارانە و بارانە..
نیشتمان! کوا ڕانت؟! کوا بەردت؟! کوا سینەی خاک و خۆڵ؟!
بالیفی خەو بینین.. هەورەکەی سەرینم.
با تاوێ مەراقی هیلاکم.. مەراقی شەکەتم
لە بنار ''گۆیژە''تا ڕاکشێ..
تا خەونی قەسیدەی داهاتووی
تازەتر ببینم!
 
ستۆکهۆڵم-تێنستا، 1995-08.04.1996
---------------
نووسینەوەی 'ماڵیک لە ئاسمان' لە 'خاچ و مار و ڕۆژژمێری شاعیرێ'ەکەوە، چاپی دووەم، 1998.