ژه‌نه‌ڕاڵی پاییز


منم ژەنەڕاڵی پاییز..
منی هەرگیز ئۆقرە نەدیو
ژنەڕاڵم...ژنەڕاڵی هەزارەها داری ڕووت و
ملیارەها گەڵای وەریو
 *
منم ژەنەڕاڵی پاییز..
کاسکێتەکەی سەرم هەورە و
ئەستێرەکانی سەرشانم چەند گەڵایەک
بەڕەنگی زیو
پاڵتۆی بەرم کزەبایە و
شمشێرەکەم لقی درەختێکی ڕزیو
 *
منم ژەنەراڵی پایز ..
درەختی ڕووت ئەم نازناوەی خەڵات کردم..
منیش نازناوی شەھیدم دا بە گەڵای ھەڵوەریو.. و
کردمە تاکە ئازیزم
لە یەک ساتا خۆم کۆرپەی گەڵاڕێزان و
ھەر خۆشم باوکی پاییزم
 *
منم ژەنەڕاڵی پاییز..

لە شانشینی پاییزا

 

بەرگم کزەبا.. دەستێکیشم زوقم.. کوختیشم گەڵای
وەریوە فەرشی..
سەرباری دڵی کەیلی موچڕکەم..
زۆر شکۆمەندم بە شانشینی پاییز و عەرشی
توخوا چۆن تاجی ئاڵتوونی سەرم.. کە ڕستێک گەڵای
هەتاوی ڕەنگە..
فڕێی بدەمە بەر پێی بەهارێ.. کە لەزگەیەکی
سەوزی بەرینە
بۆ داپۆشینی زام و برینی ئەم سەرزەمینە؟

سلێمانی، شەوی 11-11-1987

بابه‌ تاهیر

ئاخ بۆچی ده‌ستم نه‌گه‌یشته‌ هه‌ور؟..
چاوی پڕ پرسم خوێنینه‌ و نمناک
باخ سووتا.. ئه‌شکم نه‌یکوژانه‌وه‌.........،.
سوته‌مه‌رۆیه‌ سه‌رانسه‌ر ڕووی خاک
***
ئه‌وی به‌ ڕووتیی له‌ شه‌خته‌ و زوقما..
له‌ گۆ نه‌که‌وێ.. نه‌وه‌رێ په‌نجه‌ی
له‌ سه‌رما ناگا و.. گۆرانی ناڵێ..
بۆ بڵێسه‌ و گڕ.. بۆ لاروله‌نجه‌ی
***
که‌سێک له‌ گڕا.. گه‌ر هه‌ڵنه‌قرچێ..

زمانی شیعر و کۆڵکە مەلا

سەرەتا مەبەست لە کۆڵکە مەلا ئەو بە ناو مەلایانەن کە کورت بین و کەم بین و زمان پیس و جوێن فرۆشن، مە لای زانا و دانا میحرابی مزگەوت بەکار ناهێنێ بۆ تە شیر و هەڕەشە و سوکایەتی کردن بە خەڵکانی تر، دین بە زۆرە ملێیی نییە، لە مێژە قورئان فەرمویەتی ( لا اکراه فی الدین ) .

هه‌واری چۆڵ

ته‌مێکی سووری کاتی زه‌رده‌په‌ڕ..
ئه‌و ده‌شته‌ چۆڵه‌ی گرتۆته‌ باوه‌ش
ڕێبوارێکی ناو کزه‌با و زوقمم..
گوێم که‌یل بووه‌ له‌ گڤه‌ی باڕه‌ش

* * *

ڕۆژانێکی زوو له‌ ده‌وری ده‌وار..
کوانوو ئه‌گڕا.. ئاگر به‌رز و گه‌ش
ئه‌و ده‌شته‌ خۆشه‌ی جاران هه‌وار بوو..
پڕه‌ له‌ قیژه‌ و قاژه‌ی قه‌له‌ڕه‌ش

* * *

داری که‌نار ڕێ.. ده‌ست و په‌نجه‌ زه‌رد..
له‌به‌ر زریانا.. باڵا ڕووت و قووت
چاوه‌ڕێی تاوه‌ باران و ڕێژنه‌ن..
ئاسمان تێر بگری به‌ ئه‌شکی یاقووت

* * *

ته‌م و مژ

من هاواری ملیۆن داری..
به‌ر ڕه‌شه‌بای له‌په‌ل که‌وتوو.. و هه‌ڵوه‌ریوم
من زایه‌ڵه‌ی ملیۆن مه‌لی..
لانه‌ڕوخاو.. و ته‌ریوم
له‌ په‌نجه‌ره‌ی پایزێکی ئه‌به‌دیی‌‌يەوە‌
ئه‌ڕوانمه‌ دنیای ته‌م و
خوێنی ڕژاوی گه‌ڵاکان
ئه‌ڕوانمه‌ چرای کوژاوه‌ی ماڵه‌کان

*

ماسیگرێک*

له‌ په‌نجه‌ره‌ی ڕۆژانێکی به‌فرینه‌وه‌..
پۆله‌مراوی کێویله‌ی نیگای هه‌ڵئه‌فڕین و
ئه‌نیشتنه‌وه‌ به‌ سینه‌ی پانی ده‌ریای شینه‌وه‌
ئه‌و مرۆڤه‌ی ده‌ستی له‌ جه‌رگی شه‌پۆلا و
تۆڕی ڕه‌نجی له‌ کۆڵا بوو..
که‌وته‌ بنی نائومێدیی و
گێژاوێکی دێرینه‌وه‌

*

شه‌پۆله‌کان تابووتی بوون..
ناڵه‌و هاواریان هه‌ڵمژی
که‌نار ڕه‌شیی بۆ نه‌پۆشی..
ئاخ ته‌رمه‌که‌ی بۆ نه‌که‌وته‌ سایه‌ی دره‌ختێکی سه‌وز و
مه‌زاری ئاو..
سه‌ری هیوا و ئومێدی خسته‌ ناو کۆشی!

*

ونبوون

هه‌ور ئه‌سوتێ.. هه‌نسک ئه‌دا.. شه‌ویش دره‌نگه‌
تنۆکی باران.. گه‌ڵاڕێزانی وه‌رزی گریانی..
دارستانێکی دووری بێ ڕه‌نگه‌
تنۆکی باران وه‌کو هه‌زاران نه‌رمه‌ په‌نجه‌ و ده‌ست..
له‌ شوشه‌ی ساردی په‌نجه‌ره‌م ئه‌دا و
که‌ سه‌ر هه‌ڵئه‌بڕم.. به‌چۆڕاوگه‌وه‌ باران ئه‌بێته‌ خوێناوێکی خه‌ست

*

له‌ ڕه‌شت و لول و چۆڕاوگه‌ی خوێنی باراناوه‌وه‌.. ئه‌ڕوانمه‌ دوور
تارمایی‌به‌ک ڕووه‌و گۆڕستانه‌که‌.. زۆر به‌خێرایی.. زوو تێده‌په‌ڕێت
ئه‌یناسمه‌وه‌.. تارمایی ته‌ڕی به‌ربارانی شه‌و..
باڵای له‌غه‌م و ته‌ما نوقمی شاعیرێکه‌ شێت

*

کاره‌سات

زستان سه‌ری ته‌م و مژی..
هه‌وره‌بروسکه‌ی په‌رچه‌م و قژی..
له‌سه‌ر شوشه‌ی ته‌زیوی په‌نجه‌ره‌که‌مه‌
له‌ته‌م و مژ و بارانا.. له‌دووره‌وه‌.. چرایه‌ک کز.. کز ئه‌سوتێ..
حه‌په‌ی سه‌گ دێ.. ئه‌ترسم و
ده‌ستم له‌سه‌ر مشتوی شکاوی خه‌نجه‌ره‌که‌مه‌

*