کۆتاییه‌کان ته‌واو نه‌کراون
سه‌ره‌تاکان ده‌ستیان پێ نه‌کردووه‌
باخه‌کان دیمانیان کاڵه‌
ئازاره‌کان نه‌ڕواون
پێش ئه‌وه‌ی شتێک ڕووبدات،
ده‌ستت بخه‌ره‌ ده‌ستمه‌وه‌
شتێکی ماوه‌ زه‌مه‌ن بووه‌ستێ،

************

ژیان به‌ حوزنه‌وه‌ لێم ده‌ڕوانێ
ده‌نگێک له‌ دووره‌وه‌ ده‌بیستم
مناڵێک به‌لامدا
فرته‌ ده‌کاته‌ ته‌مه‌نه‌وه‌
هه‌نگاوێکم ناوه‌ له‌وه‌ی
له‌م هه‌موو شتانه‌ تێبگه‌م
تۆ وه‌ره‌و له‌ بێ تاقه‌تیمدا
جگه‌ره‌یه‌ک داگیرسێنه‌،

************

********
هیچ شتێک مه‌حاڵ نییه‌
عه‌شق نه‌بێ
هیچ جه‌نگێک سه‌خت نییه‌
جه‌نگی ته‌نیایی نه‌بێ
ده‌ر‌گاکه‌ بکه‌ره‌وه‌
باخێک له‌پێش ماڵه‌که‌تاندا ڕوواوه‌
گوڵاڵه‌ سووره‌یه‌ک
ده‌یه‌وێ بۆنی پێوه‌ بکه‌یت
هه‌تا به‌دزی عه‌یبه‌وه‌
ماچێکت بکات،

************

له‌ژێر دره‌ختی دار هه‌نارێکدا
ته‌نیایی ئه‌دوێنم
له‌ناو باغێکی شیریندا
بۆ ڕووتبوونه‌وه‌ی پڕته‌قاڵی وه‌فا ده‌گه‌ڕێم
هیچیشم پێ نه‌کرێ
ده‌توانم هه‌نارێک بته‌کێنم و
ته‌نیاییمی پێ ببه‌مه‌سه‌ر،

************

جوان نییه‌ تۆ بێیت و
من لێره‌ی ئه‌م ژووره‌ نه‌بم
باشنییه‌ لای په‌نجه‌ره‌که‌ دانیشیت و
من لێره‌ی ئه‌م ژووره‌ نه‌بم و
گۆرانیت بۆ نه‌ڵێم،
کارێکی خراپیش نییه
تۆ لێره‌ بیت و
من هێشتا
داره‌ داره‌ی مناڵیم بێت و
له‌ژێر پێی شه‌قامه‌کاندا
بۆ دۆزینه‌وه‌ی یادگارییه‌کان بگه‌ڕێم،

************

له‌نێوان ئه‌م بێکه‌سی و ته‌نیاییه‌دا
چ خه‌ته‌رناکێکه‌ خه‌یاڵات
سه‌رم له‌ حونجه‌کردنی
دێڕه‌کانی به‌رده‌ستم ده‌رناچێ
هێنده‌ هه‌یه‌ که‌ ده‌زانم
هاوارێک له‌ ڕۆحمدایه‌
مردنێک له‌ده‌ورم ده‌گه‌ڕێ
خودایه‌ ئه‌م به‌نده‌یه‌ت
هه‌تا که‌نگێی ژیان وابێت،

************

که‌سێ له‌ودیو په‌نجه‌ره‌ی عیشقه‌
سڵاوێک نانێرێ
بۆ ئه‌م به‌نده‌ شه‌که‌ته‌ی ناو ته‌نیایی
که‌سێ له‌ناو نووری شیعره‌کانما
ستاره‌ ناگرێ تۆ نه‌بی
ڕێگاکان بپێچه‌ره‌وه‌و
عاده‌ت به‌ ژیانمه‌وه‌ بگره‌،

************

که‌ هاتم..
قه‌راربوو ئاوێزانی ئه‌و ساتانه‌ بم
‌ له‌نێوان دوو قه‌وسی گه‌وره‌دا
له‌به‌رده‌م شکۆفه‌ی دێڕێکدا
ده‌ستێ وه‌رده‌مه‌
ناو خه‌ونه‌ که‌ڵه‌گه‌ته‌که‌ی ئه‌ڤین و
لای ناونیشانێکی شیرینه‌وه‌
له‌ سێبه‌ری ته‌مه‌نێکی تازه‌ پشکتووی
ناو قه‌سیده‌یه‌کی ته‌ڕدا
سڵاوێک بنێرم
بۆ دوا ساته‌کانی ته‌نیایی و
ئیتر له‌پاڵ عیشقدا گۆرانی بڵێم
گۆرانی نوێبوونه‌وه‌،

************

که‌سێ له‌پشت په‌نجه‌ره‌که‌مه‌وه
به‌ ته‌نیاییم ئاوێزانه‌
ئاوازێک له‌ودیو منه‌وه‌ هه‌یه‌
گریانی دێت بۆ حاڵم
تارماییه‌ک
به‌پێش ده‌رگاکه‌مدا ڕه‌ت ده‌بێت
سڵاوێک جێدێڵێ و
ده‌ڕوا....
خودایه‌ ئه‌م به‌نده‌یه‌ی تۆ چه‌ند ناموراده‌،

************

ئه‌و هه‌موو خۆ لوولکردنه‌
چ مه‌خسه‌ره‌یه‌که‌ له‌ ئێستامدا،
ئه‌م هه‌موو ته‌نیا‌ییه
چلۆن غه‌رقی مه‌راقیان کردووم،
ئیتر واده‌ی ئه‌وه‌یه‌
مشتێ ئاو
له‌ ڕووخساری ئه‌به‌دیه‌ت وه‌ده‌م و
له‌ ته‌هلیله‌ی شه‌وانی بێکه‌سیمدا
لای سووچی په‌نجه‌ره‌که‌م
چاوه‌ڕێی دیدارێک بکه‌م
که‌ ڕه‌نگه به‌هاتنی
فێری تێهه‌ڵچوونه‌وه‌ ببم،