من خوێنی باڵنده‌یه‌کم له‌به‌ر ده‌ڕوا ...!

هه‌وا پڕه‌ له‌ شه‌و
فواره‌ درێژ بۆته‌وه‌ تا سێبه‌ر
به‌ فڕینی باڵنده‌کاندا ده‌زانم
که‌سێک به‌ فیکه‌لێدانه‌وه‌ له‌ کۆڵانه‌وه‌ تێپه‌ڕیوه‌
به‌ره‌و سه‌فه‌ر
چه‌ند خه‌یاڵێک ئینجانه‌ و
جادده‌یه‌ک جێگه‌پێی دڵخۆشی
له‌دوای خۆیه‌وه‌ جێهێشتوون!

غه‌ریب

به‌ یادی سه‌رده‌شت و سۆران
دوو کوڕه‌ غه‌ریبه‌که‌ی شاره‌کانمان ....!

له‌ سبه‌ینێوه‌ ئه‌ده‌مه‌ غه‌ریبیی
ئه‌ده‌مه‌ شارانی گوڵ
له‌ سبه‌ینێوه‌ مناڵ ئه‌بمه‌وه‌ تا سه‌ره‌تای کۆڵان
تا بۆنی خۆشی کتێب
له‌ سبه‌ینێوه‌ چاکه‌ت و پانتۆڵه ئوتوودراوه‌‌که‌م له‌به‌ر ‌ئه‌که‌م
نیشتمان له‌ پاشکۆی ئه‌سپێکی غه‌مگین ئه‌نێم و
ئه‌ڵێم: هاوڕێیان
ئه‌ی هاوسه‌فه‌رانی بێ وه‌فا
خۆتان بگرن ئه‌‌‌وا دێم!

گه‌ڕه‌کی شاعیران

دونیا هه‌تاوه‌
به‌ر په‌نجه‌ره‌که‌م سێبه‌ر
ته‌یرێک له‌به‌ر هه‌تاوه‌که‌دا،
هه‌ڵنیشتوو به‌ جلکی ڕه‌شه‌وه‌ له‌سه‌ر چڵێک به‌فر
خه‌واڵوو ده‌چمه‌ به‌ر په‌نجه‌ره‌که‌
دایکم له‌ هه‌یوان به‌دیار قوڵپی سه‌ماوه‌ره‌وه
دیژله‌مه‌ ده‌خواته‌وه‌ و له‌به‌رخۆیه‌وه‌ قسان ده‌کا‌
به‌و به‌یانییه‌
زوڵێخا له‌ سه‌ربان جلک هه‌ڵده‌خات

*