لەگەڵ منی بوو؟
(1)
هەرچەند ئەوەی دوێ شەوی بیر دەكەوتەوە بزەیەك دەیگرت وخورپەیەك بە هەناویا دەگەڕا، هەموو ورتە و جووڵە و هەناسەیەكی هاوسەرەكەی وەكو فیلمێكی رەنگ كاڵی زەمانی زوو بەبەرچاویا بە پچڕ پچڕی دەهاتو دەچوو، لەگەڵا هەڵتەك هەڵتەكی پاسەكەدا و غەڵبە غەڵبی خەڵكەكەو نوزە نوزی گۆرانی رادیۆكەدا كاڵو كاڵتر دەبۆوە تا دەبوو بە فیلمێكی رەشوسپی كۆن و بە پەنجەرە تووند داخراوەكەی تەنیشتییەوە دەنووسا و لەسەر یەك گرتەی زۆر رۆمانسی دەوەستا، كە لە پڕ شەپۆلی گەرماكە لە هەناوییەوە سەركەوت و هەناسەی سوار بوو، بەپەلە پڕوسكێ پەنجەرەكەی تەنیشتی راكێشاو بەیەك تەكان كردییەوە، رەشەبایەكی سارد وەكو شەختەیەكی باڵدار خۆی كێشا بە رووی وسنگ و لاملیا، كوڕە هەرزەكارەكەی تەنیشتی زۆر بە رەقی وڕقەوە پەنجەرەكەی داخستەوە، بەجۆرێك كە قۆڵا وشانی قەمسەڵە چڵكنە بۆگەنەكەی هەڵسو لە چڕوچاوی ژنەكە.
ژنە كەوتە باوەشێن كردنی خۆی بە چمكی سەرپۆشە سپییەكەی ولەبەر خۆیەوە ورتە ورتێكی كرد(رۆڵە هەناسەم تووند بوو بۆیە پەنجەرەكەم كردەوە..)، كوڕە هەرزەكارەكەش بێئەوەی ورتە لە دەمییەوە بێت لەسەرخۆ درزێكی كردە پەنجەرەكە، ژنەش لەبەر خۆیەوە(عەمر درێژ بی).
پاسەكە وەستا، كوڕە هەرزەكارەكە دابەزی، كوڕێكی گەنجی شیك سەركەوت و لە جێگەكەی دانیشت،بەحاڵا بۆنی جگەرەی لێدەهات دەستی برد بەهێواشی درزی پەنجەرەكەی گەورەتر كرد بۆنی عەترێكی تیژی بەسەر ژنەكەدا باران، ژنەكە هەناسەیەكی ئارامیی دایەوە، كچە قژكاڵەكەی بەردەمیان بە حاڵا ئاوڕێكی دایەوە وبە تیلەی چاو لە كوڕە گەنجەكەی روانی، ژنەكە بزەیەكی بۆ كردو جارێكی دی ئەوەی دوێ شەوی بیركەوتەوە(چۆن مێردەكەی شووشە عەترەكەی كرد بەسەروسنگی خۆیاو چۆن دوایی بەلەزەتەوە جگەرەیەكی كێشا كەئەم ناڕەزایی دەربڕی لەوەی چۆن لە ژووری نوستندا جگەرە دەكێشێ، وتی: توخوا وازم لێبێنە زۆرم حەز لە جگەرەیە دوای ئەو شتە و خۆ ئێمەش فەسڵاو فەسڵا نەبێ كوا..چۆن هەتا سەعاتێ هەر پێدەكەنین بەیەكتری و.. چۆن..)كچە قژكاڵەكەی بەردەمی ئەمجارە بەتەواوی ئاوڕی دایەوەو زەردەخەنەیەكی پانی بۆ كوڕە گەنجەكە كرد، كوڕەش لە ژیّر لێوەوە شتێكی وت كە ئەم تێنەگەیشت، پاسەكە گەیشتە سەر پردەكە كچەكە بە دەنگێكی ناسك كەبە زۆر ناسكتری كردبوو وتی دابەزین هەیە، كەهەستا كوڕە گەنجەكەش بە پەلە بە دوایدا هەستا و ژنەكەش لەدوایانەوە هەستاو لەناو دەرگای پاسەكەدا لەترێكیدا، خێرا خۆی گرتەوە و دابەزی، دەنگێكی گڕ لە دوایەوە وتی: پیرێژن وریا بە نەكەوی!
ژنەكە لەو چركەیەدا قاچی بەر زەوییەكە كەوت، بە حەپەساوی ئاوڕی بۆ دواوە دایەوە تا بزانێت چ پیرەژنێك لە دواوەیەتی و خەریك بووە بكەوێت تا یارمەتی بدات یا دەستی بگرێت، رووخساری پیاوێكی كامڵی بینی زەردەخەنەیەكی تاڵی گاڵتەجاڕانەی بۆ كردو سەرێكی بادا، ئەمیش لە جێی خۆی رەق راوەستاو بە واق وڕماوی (لەگەڵ منی بوو؟ بە منی وت پیرێژن!..) مەوالیدەكەی خۆی هێنایەوە یادی بەپەلە دەساڵ دەساڵ كەوتە ژماردنی، تا گەیشتە شەست و یەك، هەستیكرد هەردوو قاچی بووە بە قوڕقوشم و بە زەوییەكەوە نووساون، دڵی كەوتە گورپە گورپ، دیسانەوە هاڵاوێكی گەرم لە ناخییەوە سەریكرد، عەباكەی كردەوە، رووی وەرگێڕا، تەوژمی رەشەبا ساردەكە لە چەند چركەیەكدا گەرماكەی راماڵی، و عەرەقێكی ساردی كردەوە، وردە وردە لەرز دایگرت، پشتی كردەوە رەشەباكەو عەباكەی تووند كرد، هەستی كرد هەنگاوەكانی قورسن و بەدوایدا نایەن، سەری هەڵبڕی بۆ ئەو دوكانە گەڕا كە بۆی هاتبوو، بەرچاوی لێڵ بوو، دەستی برد بۆ چاوی (دیسان عەینەكەكەم بیرچووە).
خۆی كرد بەو دوكانی قوماشەدا كە بۆی هاتبوو كابرای قوماشفرۆش وەكو هەمووجار كەوتە موجامەلەكردنی و یەك لەسەر یەك تۆپە قوماشی جلی كوردی بۆ دەكردەوە لە سەوز و مۆر و شین وقاوەیی و زیرەیی و.. ئاوڕێكی لە ئاوێنەكەی سەردیوارەكەی تەنیشتی دایەوە، ئەوەی لە ئاوێنەكەدا بینی ژنێكی سووروسپی قژسوور بوو، زەردەخەنەیەكی بۆ وێنەكەی خۆی كرد، بەرچاوی بەجارێ چرچ بوو لۆچێكیش كەوتە نێوچەوانی، بەكابرای دوكانداری وت (ئەو قوماشە چویتییەم  بۆ دادڕە).
 
(2)
كە هەستا بۆ نوێژی بەیانی، سووچێكی پەردەكەی لادا بینی ئەستێرەكان جریوە جریویانەو یەك پەڵە هەور چییە بە ئاسمانەوە نییە.. زانی سبەی كە هەینییە دەبێت بچێت بۆ گۆڕستان.
(ئەی چیبكەم چۆن نەچم! هەر دوو جومعە دیار نەبم دشە دەمەوەرەكەم دنیام لێ پڕئەكا و هەزارویەك قسەو باسم بۆ هەڵەبەستێ و..)
نۆ ساڵا لەمەوبەر مێردەكەی كتوپڕ بێ هیچ نەخۆشی یا رووداوێك بەلاداهات و مرد لە كاتێكتدا بەرامبەر تەلەفزیۆنەكە دانیشتبوو سەیری هەواڵەكانی دنیای دەكرد.. وایزانی سوعبەتی لەگەڵا دەكات تا ئەو دەمەی جگەرەكەی دەستی كەوتە پەنا لاملییەوەو جووڵەی بۆ نەكرد ئینجا زانی گیانی سپاردووە و كردی بەهاوارو رۆڕۆ، سەرەتا یەكەم ساڵ هەموو هەینییەك دەچووە سەر گۆڕەكەی، بەڵام وەكو دەڵێن كەیەكێك دەمرێت هەموو رۆژێك كێوێك دەكەوێتە بەینەوە و ئیتر وردە وردە خەمەكە كاڵ دەبێتەوەو مەیلە كز دەبێ و
(وانییە.. بەڵام ئینسان لەگەڵا عەزابی قەبردا رایەت نەخوازە ئازیز مردن، ئەگینا  ئەو خەمە هەر بەسوێیە و مەیلەكەش هەر ئەمێنێ، بەڵام ئیتر مەشغەڵەتی دنیاو ناساغی ومنیش پەكمە و پی..رر.. ئیتر ئاوا )
خەمەكە كاڵ دەبێتەوە و مەیل و پەرۆشیی كەم دەبێتەوە و مرۆ بەرەبەرە تاقەتی دەچێت چونكە دەزانێت ئەوەی لەو گۆڕەدایە ئەو ئازیزە نییە بەڵكو كۆمەڵێك ئێسك و پروسك و مووی زبرو خۆڵاوییە، كوا ئەو جەستە گەرمە پڕ ژیانە، ئەو چاوە بەبەبریسكانە و..
(ئا بەخوا ئەو قژە پڕە خاوەی یەك تاڵی سەری نەڕووتابۆوە هەرچەندە ماشوبرنج ببوو.. ئەو باڵا بەرزەی.. ئەو لەبزە شیرینەی كوا؟! قەت ئەو سوێیەی لە دڵم دەرناچێ.. بەڵام چیبكەم!!)
ئەودەمەی مێردەكەی مرد هێشتا ئەم گەنج بوو، سپیكەلەیەكی خانومان وجوانكەلە بوو، مناڵەكانی هەرزەكار بوون، بەڵام هەرزوو دوای ئەو مردنە كتوپڕەی مێردەكەی، بەچەند ساڵێك تەندرووستی داڕما ئەگەر چی بە رواڵەت هێشتا هەر جوانكەلەیە..
(بەخوا وابوو ئەو مردنە كتوپڕە دایڕزانم.. موشكیلە و خەم وخەفەتی كچی بێباوك و بەزموڕەزمی كوڕی هەرزەكاریش لەوێوە بوەستێ.. ئاخر كابرا هیچی نەبوو لەو سەدمەیەوە ئەوەندەی پێنەچوو لە حەیزیش وەستامەوە..)
ئەم هەینیەش وەكو هەموو ئەو هەینیانەی كە كەشوهەوا ساماڵ و بێباران دەبێ  لەماڵا دەرچوو، ئەمە چەند مانگێكە لەگەڵا كچە دراوسێیەكی رێكەوتوون پێكەوە دەڕۆن بۆ گۆڕستانەكە، یەكی چەپكێك گوڵیشیان بەدەستەوە بوو، لەسەر شەقامەكە تاكسییەكیان گرت وبەرەو گوڕستان كەوتنە رێ ئەو بۆسەر گۆڕی خوشكە گەورەكەی كە تازە بەسەر مناڵەوە رۆشتبوو، ئەمیش بۆسەر گۆڕی مێردەكەی، هەر چەند بچوایە بۆ سەر گۆڕی مێردەكەی لە باخچەكەی ماڵەوە چەپكێ گوڵی  لێ دەكردەوە، هەمیشە چەپكە گوڵەكەی زۆر بەناسكی دەگرت نەكا بژاكێت هەر وەكو ئەوەی بۆ ژوانی بچێت و بیەوێ چەپكەكەی بە جوانی و رەونەقەوە پێشكەش بكات.
( ئەی چۆن ئەو باخە درەخت بە درەختی، هەموو بنچكە گوڵێكی بەدەستی خۆی چاندوێتی، مێوەكانی ئەبڕی، كەپرەكە خۆی كردی، چوار فەسڵەی ساڵا بە دەورو خوولیا ئەهات و ئەچوو، ئەی منیش وەكو نوری چاوم ئەیپارێزم و هەموو جار چەپكێكی بۆ ئەبەم حەزم لەو گوڵە بێبۆنانەی دوكانی گوڵفرۆشەكان نییە هەر ئەڵێی گوڵی نایلۆنن.. )
لەمسەر كە گەڕانەوە لە دامێنی گردەكەوە تەكسییەكیان دەستكەوەت، كابرایەكی چەنەباز بوو دەیویست لەگەڵیان سەری قسەوباس دامەزرێنی بەڵام ئەم نقەی لێوە نەدەهات و بەشداری هیچ قسەوباسێكی نەدەكرد، بەڵام كچە دراوسێكەیان  جاروبار وەڵامیدەدایەوە و هەندێ قسەی دەكرد، كەنزیك ماڵەوە بوونەوە ئەم پێنج هەزارییەكی دەرهێنا و دەستی درێژكرد بیداتە دەست سایەقەكە كچە دراوسێكەیان بەپەلە سێتاك دیناری دەرهێنا و وتی (ئەوەی مەیەرێ من وردەم پێیە) سایەقەكە قاقا پێكەنی و وتی(خوشكم لێیگەڕێ تۆ هەقت چییە بزانین پیرێژن خۆی چەندمان دەداتێ؟!)  ژنەكە دەرگای تاكسییەكەی كردەوەو پێنج هەزارییەكەی بۆ سایەقەكە فڕێدا و وتی (ها بگرە..خۆت پیرەمێردی من پیرە ژن نیم).