ئەشێت تۆ سەمای ناو ئەم خوێنەت پێ جوان بێ و من ئەوگوڵانەی ئێوە بە شمشێر ئەیانبچڕن، تۆ خەونی ئەو پیاوەت پێ جوان بێت بەباڵی شمشێر ئەفڕێت و من ئەو كچەی بەباڵی پەروانەكان ئاسمان تەی ئەكات. تۆ ئەو قەفەزەت خۆشبووێ ڕۆحت لەناو خۆیا ئەخنكێنێ و من ئەو فڕینەی چوارچێوەكان ئەشكێنێ. تۆ ئەو تەفسیرەت خۆشبووێت وەكو خوێن بە شمشێرەكانا دێتە خوارو من ئەو خودایەی شوێن پەنجەی خۆی لە جوانی گوڵەكانا بەجێدێڵێ، تۆ ئەو خەنجەرەت خۆشبووێ بە خوێنی سەدە كۆنەكان ژەنگ ئەكات و من ئەو شیعرەی چەند بیكوژن ئەوەندەی تر زیندوو ئەژی .
ئەشێت تۆ پێت وابێت قیامەت لە كوشتنی تەفسیرێكتەوە دەست پێ ئەكات و منیش لە پیركردنی سێوێكدا، ئەشێت تۆ گۆرانی ناو تاریكایت پێ جوان بێت و منیش سەمای بەرباران، ئەشێت تۆ بە سەمای چڵە نازنازێك تێك بچیت و منیش بە قریشكەی فریشتەیەك بمرم، تۆ بەدەم دەنگی شمشێرەكانەوە سەما بكەیت و منیش (شیرین تەشی دەڕێسێ)كەی (فەتانەی وەلید)ی بمكوژێت. ئەشێت تۆ ئەو سروودانەت خۆشبووێت بۆنی تابووت و خوێن و كوشتارگایان لێ دێ و منیش (پەپوولەی ئازادی)یەكەی (مەزهەری خالقی). ئەشێت تۆ لە دیوانەكەی حەزرەتی (مەحوی)دا بۆ شمشێرێكی كۆن بگەڕێیت منی پێبكوژیت و منیش سێبەری ژنێكی سوتاوت نیشان بدەم، ئەشێت تۆ لە(نالی)دا بیابانێك بدۆزیتەوە بە سەراب تینوێتی ئەشكێ و، من عیشقێكی تینوو بۆ حەبیبەیەكی لەناو دڵیاكوژراوت نیشان بدەم، ئەشێت تۆ لە شیعرەكانی ئەو حەزرەتەدا، ئەو دەموچاوانەم نیشان بدەیت ساڵەهای ساڵ لە سوجدەدا بەجێماون و منیش عیشقی ئەو ژنانەت نیشان بدەم لە پشت ئەو دەموچاوانەوە لەناخەوە سوتاون. بیرت نەچێت تۆ ئازادیت لەوەی لە چاویلكەكەی خۆتەوە سێبەری ژنی ناو قەصیدەیەكم لێ بكەیت بە عیبادەت، منیش ئازادم لەوەی لە (مەلای سوختە)كەی (غەزەلنوس و باغەكانی خەیاڵ)ی(بەختیار عەلی)دا بۆ (بەهاربانو)یەكەی ژێردەستە و دیل و عەوداڵ و عاشق وێڵ بم. تۆ ئەتوانیت سێبەری خودایەكم لەناو شیعری ئەو زاتانەدا نیشان بدەیت، بەڵام هەرگیز ناتوانیت سێبەری ژنێكی عاشق و دڵێكی كوژراویان تیادا ڕاو نێیت .
ئەی جەللادی، برام خەونی خۆت بۆخۆت، خەونی خۆم بۆخۆم، بەڵام مێژوو موڵكی كەسمان نییە، كلتور موڵكی كەسمان نییە، هەروەك چۆن من ناتوانم عاریف بوونی ناو شیعرێكی مەحوی بخەمە گۆڕ، تۆش ناتوانی (بەهار بانو)ەكەی ناو قەصیدەكانی ئەو بخەیتە گۆڕ، من چۆن ناتوانم تەهلیلەی ناو خانەقا و تەكیە و حوجرەكان لە مێژوو جیابكەمەوە، تۆش ناتوانیت هارپ، سەنتور، شمشاڵ، ڕەشبەڵەك، هۆرە، سیاچەمانە، حەیران..... بخەیتە گۆڕ، هەروەك من ناتوانم عیبادەتی ناو شیعرێكی (بێخود)ت لێ بكەم بە جوانپەرستی ژنێك، تۆش ناتوانیت جوانپەرستی ناو شیعرێكی (مەستورەی ئەردەڵان) لەو كلتورە جیابكەیتەوە. خۆ ئەگەر بەشێك لە شانازیی مێژووی میلەتەكەی ئێمە بگەڕێتەوە بۆشمشێرەكەی (صەلاحەدینی ئەیوبی) ئەوا بەشەكەی تری ئەگەڕێتەوە بۆ (خانزادی سۆران) و (حەبسەخانی نەقیب) و( عادیلەخان) و(مەستورەیئەردەڵان). وەك چۆن من ناتوانم تەهلیلەیەك ببەمەوە سەر ڕەچەڵەكی عیشقی ژنێك تۆش ناتوانیت دەوڵەتی (ماد)و ئاینی (زەردەشتی )و (یەزیدی )و (كاكەیی)و.... لەمێژوو و، ڕۆڵی ژن لە كلتوری كوردی خاڵی بكەیتەوە.
برای جەللادم، تۆ ئەتوانیت ڕەنگێكی ترت هەبێت وەلێ مافی ئەوەت نییە ئەم شەقامە خاڵی بكەیتەوە لە ڕەنگ، تۆ ئەتوانیت بەو ئەندازەیەی كە بوونت هەیە بدوێیت ،بەڵام بەناوی منەوە مافی ئەوەت نییە خەونی گوڵ دیل بكەیت كاتێك من ئیمانم بە دیلكردنی خەونی پاساریەكیش نییە.ت ۆ ئەتوانیت خەونێكت هەبێت بۆی بژیت، بۆی بمریت، بەڵام مافی ئەوەت نییە ڕێگای خەو بینین لە من بگریت. ئاخر من پێم جوانە لە باخچەیەكدا بژیم گوڵەكانی لەبەر تریفەی مانگدا بپشكوێن و تۆش پێت خۆشە لە بیابانێكا سەراب بخۆینەوە لەبری ئاو. تۆ ئازادیت لەوەی چۆن بیر ئەكەیتەوە، منیش ئازادم لەوەی چۆن بیر ئەكەمەوە، دواجاریش ئەوەی بڕیار ئەدات هەمووان چۆن بژین زۆرینەیە نەك من و تۆ، بۆیە پێت ئاسایی بێت گەر تۆ لە دیانەتێكدا بۆ ژنێكی نموونەیی بگەڕێیت و من لە(گرەوی بەختی هەڵاڵە)كەی (عەتا نەهایی)دا بۆ نموونەییەكی كوژراو بگریم، تۆ لە ڕێگای ئەمیرێكتەوە دونیابینیەكی تر بدۆزیتەوەو، من لە(ئێوارەی پەروانە)كەی (بەختیارعەلی) دا، تۆ بەچاوی لەشفرۆشێكی قێزەوەن سەیری دەردەدارێك بكەیت برسێتی كردویەتی بەلەشفرۆش و من لەدیدگای (ڕاسكۆلینكۆف)ی ناو (تاوان وسزا)كەی (دیستۆ فسكی)یەوە بۆی بڕوانم.
ئەی جەللادی برام، لات ئاسایی بێت ئەو نیشتیمانی عەرەبیەی كە بە هەموویان سەرەدەرزییەكیان پێ دروست ناكرێ و بەو هەموو دەوڵەتە زەبەلاحەوە كۆیلەی چوار ملێۆن كەسن و، هەتا ئەمرن ئەبێت بڵێن(بوومان بوومان)و خۆراواو جولەكەش بڵێن (هەسمان هەسمان حسێبە).لات ئاسایی بێت من بۆ ئێسك و پروسكی ئەو ژنە ئەنفالە بگریم بە مناڵێكی زۆڵەوە، بەناوی خوا و ئوممەی عەربیەوە كاسەسەریان پڕ كرد لە گوللە و، تۆش بۆ فەلەستینییەكی (غەززە)بگریت. كاتێك ئێمە ئەنفال و ئەتك ئەكراین بە هەموو عەرەب كەنالێكیان نەبوو فرمێسكێك بڕێژێ، كاتێك تەرمی مرۆڤ و باڵندە و قورئان لە هەڵبجەدا ئەسووتا، خواناسێكیان نەیان فەرموو خوا ڕابەرداری نییە مەملەكەتێك بەو وەحشیگەریە بخنكێنرێن!!
برای جەللادم، بۆیە پێت ئاسایی بێت من (خۆشەویستی لەزەمەنی كۆلێرا)كەی (گابرێل گارسا ماركێز)یا (ئەو دەمەی نیچە گریا)كەی (ئیرڤین دی یالۆم) پێ جوان بێت و تۆش لە ژێر كاریگەری پیاوێكی، مەغریبی ،لیبی ،تونسی ....دا بێت بەڵام حەقیقەتێك هەیە گوێ لە كەسمان ناگرێت ئەگەر من وتم بیری خۆراوا باشە و تۆش وتت شارستانیەت لە ڕۆژهەڵاتەوە دەستی پێكرد، دواجار ئەو حەقیقەتە بڕیار بە دەستە ئایا خۆراوا و خۆر هەڵات كامیان مرۆڤایەتییان گەیاندە لوتكەی شارستانیەت و كامیان شارستانیەتی ئەویتریان نەبێت قوڕ بەسەر ئەبن؟
بۆیە لات ئاسایی بێت من پێم وابێت ئەوان جوانییەكیان هەبووایە، هونەرو زانستێكیان هەبووایە، ڕۆژیان بەم ڕۆژە نەئەگەیشت و تۆش پێت وابێت ئەوان چاویان لە(نیمچە دورگەی عەرەبی) بكردایە ڕۆژگاریان بە ئەمڕۆ نەئەگەیشت، بەڵام لە نێوان من و تۆدا حەقیقەتێك هەیە ئەویش ئەوەیە ئەگەر تۆ لە ژێر كاریگەری بیری عەرەبی، ئێرانیدا بیت ئەشێت ئەو مافەت نەبێت ئەومافەش لە خەڵك زەوت بكەیت خەڵكیش لە ژێر كاریگەری بیری خۆراوایدا بن ئاخر (سەلاموعەلەیك)و (گود بای) بەقەد یەك زیانیان بۆ زمانی كوردی هەیە و كلتوری كوردیش لە هەردوكیان جیاوازە، نە ئەچێتەوە ژێر مانتۆكانی ئێران و حیجابی دەوڵەتانی خلیج و نە ئەشچێتەوە سەر مۆدیلی خۆراوا، ئەچێتەوە نێو ئاتەشگەكان و لەماڵی (مەم و زین)كەی (ئەحمەدی خانی)دا شێوەی خۆی وەرئەگرێت. بۆیە پێت ئاسایی بێت كە تۆ ویژدانت بۆ (غەززە)بسوتێ و من بۆ (كەركوك) خوێن لە هەستم بتكێ، ئاسایی بێت كە تۆ لە ناو بیری پیاوێكی (سعودی)دا بە دوای جوانییا بگەڕێیت و من لە (نیچە)ی ئەڵمانیدا، تۆ شمشێرەكەی پیاوێكی بیاباننشینت پێ جوان بێت و منیش گوڵی باخچەیەكی خۆراوا، تۆ لە ناو پۆشاكی دیندارێكی ئێستای ئێرانیدا ژیان بەڕێ بكەیت و منیش لە(دڵم بەباخچە ئەسوتێ)كەی (فەروغی فوروغزاد)دا.
برای جەللادم، من و تۆ لەسەر خاكێكین كە خاكی هەردووكمانە و پێویستە بەم هەموو جیاوازیەوە، جیاوازیەكانی یەكتریمان قبوڵ بێ و خوێن بۆ ئەم خاكە بدەین و سەرەتا ئەم خاكەمان خۆشبووێت كە خاكی صەلاحەدینی ئەیوبیە، ئاخر ناكرێت ئێمە بگەینە ئەوشوێنەی (صەلاحەدین) لەدوری هەزاران كیلۆمەترەوە بۆ ئیسلام ئازادی كرد و ماڵەكەی صەلاحەدینیش كاول بكرێ!! دواجاریش ئەمەوێت پێت بڵێم من و تۆ بە جیاوازیەكانامانەوە مەحكومین بەوەی پێكەوە بژین، مەحكومین بەژیان بەڵام كەسمان مەحكوم نین بەوەی ئەویترمان بكوژین