| هەرچەن ئەکەم، ئەو خەیاڵەی پێی مەستم | بۆم ناخرێتە ناو چوارچێوەی هەڵبەستم! |
| لێکدانەوەی دەروون، قسەی زمانم: | بۆچی وەها دوورن لەیەک؟ نازانم! |
| ئەمویست دەروون بکرایەوە وەک تۆمار | دەرکەوتایە دنیای جوانتر لە بەهار، |
| دەرکەوتایە: ئاوات، هیوا، خەوبینین... | پرشنگدارتر لە ئەستێرەی قوبەی شین! |
| دەرکەوتایە: مانای مەنگی دەریایی، | کە نەرمەبا لە ڕووی ئەدا ئەسپایی |
| دەرکەوتایە ئەو دنیایەی کە شیعری | بێ فرمێسکە و زۆرتر لە فرمێسک ئەگری |
| زەردەخەنەی بێ ئاوێنەی دەم و چاو | تیژگێک ئەدا ڕووناکترە لە هەتاو!.. |
| بەڵام ئەفسووس! کە ئەو شیعرە جوانانە | باڵدارێکن جێ ناهێڵن هێلانە |
| لە ناوەوە ئەجریوێنن، ئەخوێنن | هەرگیز قەڵەم بە کاغەزا ناهێنن!.. |
نووسینەوەی لە دیوانی گۆران ەوە