"هەوری خەفەتە بەفری غەمی داوە بە سەرما 
  یا سەڕسەڕی دووریتە کە لێی کردمە سەرما " 
                                     -حەریق-
 

داوود دەگەڕێتەوە ، دڵی کەنارییەک خەبەری داوە !
بەبێ داوود ، ئێمە زەرنەقووتەی بێ دان و ئاوین 
بەبێ داوود ، ئێمە چاوی بێ خەوین ،
 ئێمە لوتکەی جەهل و ئێمە خەرەندێکین پڕ لە مردن!
بەبێ داوود ، قەبیلەیەکی تفەنگچیین ، یەکتری ڕاو دەکەین!
داوود دێتەوە ، خەونەکەی دایکم وا دەڵێ !
داوود دەگەڕێتەوە ، 
لەدەروازەی شار ، کێوەکان دەچنە پێشوازی .
دەشتەکان فەرمووی ڕۆیشتنی 
بەسەر دەستی خۆیانی لێدەکەن !
داوود دێتەوە و لە پێشدا دەچێتە سەر "تانجەرۆ" 
لەوێوە بانگی پاسارییەکان دەکات
 بچن خۆیان "تەعمید" بکەن !
داوود دێتەوە و 
باڵندەکانی "سلێمانی" دەبنە پەرژینی .
تاوسەکانی "باخچەی گشتیی" سێبەری بۆ دەکەن !
داوود کە دەگەڕێتەوە ،
دڵم لێیداوە ، کات شەو دەبێت کە ئەم مانگی دڵە 
بە خۆی و سایەقەی ساماڵی ، 
بە خۆی و شەوقی نوکتەکانییەوە دێتەوە !
ئەستیرەکانی سەرشانی 'قەڵاچوالان'
 گۆچانی ڕووناکیی وەک جاری جاران ئەدەنەوە دەستی .  
بۆ سبەی   
لەسەر شەرەفی هاتنەوەی ئەم جانی جانانە ،
خۆر ، نیوەڕۆخوانێکی عاشقانە 
بۆ هەنارانی عاریف و بۆ فریشتەکانی داوود ،
بە گوڵ و مرواریی  
لە کەناری جارانی بەختەوەری ، 
لای دەریاچەی پڕ بلوری پێغەمبەران 
دەڕازێنێتەوە بە مەی ، بە ڕازیانەی خۆشەویستی !   
داوود دێتەوە و
 من دادی خۆم دەبەمە لای ئەو . 
پێی دەڵێم من یەکێکم لە کوڕە غەریبەکانت 
من سولەیمانەکەی خۆتم !
لاووکی غەم و 
بەیتی غەدر و 
مەزمورەکانی غەریبییت بۆ دەچڕم .
پێی دەڵێم : 
ڕەنگەکانی ناو دەستی خۆتم بدەرێ
 قسەکانی ناو دڵتم بدەرێ 
پەلکەزێڕینەی پشت سەری خۆتم پێ ببەخشە !
ئەمجارە جانتاکەم پڕ پڕ دەکەم لە سپێدەی ڕەنگی تۆ  
ئەمجارە گیتارەکەم وا دەژەنم ، 
تەڕ تەڕ بێت بە بارانی دەنگی تۆ . 
ئەمجارە گەر بڕۆم ، بە تەنیا پێکەنینەکەی تۆ دەبەم .  
بە تەنیا چاویلکەکەی بان دییەی تۆ دەبەم .
ئەمجارە گەر تۆفانی سەفەر بردمی 
بە تەنیا سنەوبەرێکی عاشقی "دەباشان" لەگەڵ خۆم دەبەم !
 کە دێتەوە پێی دەڵێم ؛ 
- لەسەر لەپی دەستەکانت ، باڵندەی نیشتمان ماندووە دەیەوێ سەرخەوێک بشکێنێت .
- ئەوانەی لە بەهەشت دەرکراون ، بلوری دڵیان شکاوە دەیانەوێت لە ئێوارەی برینێکدا 
  یاقوتی حوزنت لەگەڵدا بەش کەن !
سەفەرەکەی داوود 
 نە ڕۆژێکە 
نە مانگێکە ،  نە ساڵێک !
سەدەیەکە داوود 
لە داخی شەڕەکانی ئێمە 
سەفەری کردووە بۆ پشت قەفقاسی تەنیایی . 
سەدەیەکە خۆر بەو هەیبەتەی خۆیەوە 
لەتاو دووریی داوود 
هەموو ڕۆژێک خۆی ڕووت دەکاتەوە و 
خۆی دەهاوێتە ناو ڕووباری مردن و ، نامرێت !
سەدەیەکە کانی ، بەو چاوە قڕژاڵییانەی خۆیەوە 
ئەشکەوتان دەگەڕێ 
 بن بەرد و تاوێران بۆ داوود تەی دەکات .
داوود لە کوێیت ؟
 ئەوە هاواری کانییە لەو شاخانە بەردەبێتەوە ناو عەدەم .
ئەوە دەنگی مێژووە لەو بنارانە چاوەڕێی 
گەرووی داوودە هەتا ئەبجەدییەتی ئازارەکانی بڵێتەوە .
لە کوێیت داوود ؟ 
دنیا پڕ بووە لە گورگ و ، 
دەشتەکان پڕبوون لە قەهر و ، 
ڕوبارەکان بەدەم خەیاڵەوە ڕێ دەکەن .
باخچەکان شەرابی خۆکوشتن ئەدەنە گوڵەباخ . 
لە ماڵی کام ئازاردا ڕاکشاویت داوود !
لە سەر بەرماڵی کام ڕەشەبا نوێژ دەکەیت داوود !
لە کام ژووری مێژوودا
 چرای میهر بۆ دڵانی تاریک هەڵدەکەیت داوود !
وای داوود ، با دونیا بزانێت ؛
 تۆ ڕۆژێک لەم خەڵوەتە سپییەی خۆت دێیتە دەرێ .
دەچیتەوە لە "یاخسەمەر" قسە لەگەڵ خوادا دەکەیت . 
لە نێوان گۆچانەکەی تۆ و مووسادا 
ئەو دەبوو بە مار سەمای دەکرد .
لێ گۆچانەکەی تۆ دادەگیرسا 
دەچووە دیدەنی ئاو 
ڕوباری دەوەستاند ، هەوری ڕا دەگرت !
تۆ دەزانیت داوود ؛
"کاڤاڤیس" شاعیرێکی تەنیا بوو ، هەمیشە دەیوت:
"ئەمێستاکە ، بێ هاتنی بەربەرییەکان 
داخۆ ئێمە چییمان بەسەر دێت .
داخۆ بەربەرییەکان کەی دێن !" . 
کەچی من دەڵێم ، ئێمە بەبێ گەڕانەوەی داوود 
کەسمان نازانین ، 
ئەوە خاچی نیشتمانە ئازارمان ئەدات 
یان مێخ و بزمارە خوێناوییەکانی خۆمانن 
بە دیواری ئەشکەوتەکانی عێراقێکی پڕ ئاشوبدا 
هەتا لێوارەکانی مردن هەڵمان دەواسن ، چۆن هەڵواسینێک! 
ئێمەی منداڵەکانی تۆ داوود 
بێ گەڕانەوەی تۆ ، 
هەموو قاوەگرەوەکانی دونیاش نازانن چییمان بەسەر دێ !
بێ تۆ نازانین چۆن ئەم گوندە ڕوخاوە 
بکەینەوە بە ئاوایی هەزارگوڵ و هەزارکانیی و 
هەزار باخچە و هەزار عاشقی پڕ ئەوین و جوانیی !
داوود ، 
ئێمە نازانین بێ چەخماخەی ناو دەستەکانی تۆ 
 لە تاریکییدا چۆن خۆمان دابگیرسێنین !
داوود بگەڕێوە .
بەرلەوەی ڕەنگەکان سەفەری کۆتا بکەن 
بەرلەوەی بەربەرییەکان بگەن 
بەرلەوەی کێوەکانی ئەسەف 
هاڕە بکەنە ناو ڕوبارەکانی نائومێدیی . 
یان چاڵەکانی ئاگر 
خۆیان بە هاواری گوڵە شەهیدەکان پڕ کەنەوە ، 
تۆ بگەڕێوە داوود .
گورگان بەڕێوەن داوود 
عاریفانە ژێی تیروکەوانەکەت ڕاکێشە .
وەک جاران عاشقانە چڵێک خەونم بدەرێ ، 
ئێرە سەرەتایە بۆ هەڵمژینی شیعرێکی قووڵ .
ئەم پێدەشتی ڕۆحە سەرەتایە
 بۆ هەڵاتنی نزاکانی یوسف لە بنی بیرە خامۆشەکانی شۆڕش !  
دەستێکتم بدەرێ داوود  
کانیی برینم هێند قووڵە ، ئەم نەزیفی عەزابەم پێ ناوەستێ. 
حەرفێکی داگیرساوی خۆتم بدەرێ 
چیرۆکی ئەم مردنەم هێند تاریکە 
 نازانم چۆن چۆنی رۆشنی بکەمەوە داوود !
داوود دڵم خەبەری داوە دێیتەوە و 
وڵاتێکم پێدەبەخشیت 
پڕە لە باڵندەی عاشق
پڕە لە بارانی وەفا 
وڵاتێک بۆ یەکەمجار خۆری لە باکوورەوە لێ هەڵدێ .
بۆ یەکەمجار 
هەرچی ئەو تاوسانەی پەڕوباڵی غروریان شکێنراوە
 هەرچی ئەو کۆترانەی گمەی شیعریان سوتێنراوە 
هەرچی ئەو تەیرەن ئەبابیلانەی لە 'حەبەشە' دەرکراون
هەرچی 'نالی'یەکانی دونیایە 
دێن و لەبن کەپرەکانی ئەم وڵاتەی تۆدا 
دەبنە پەناهەندەی عاشق !
داوود ؛
چەندین هەتاوە من چاوەڕێی هەڵهاتنی ڕوخساری تۆ دەکەم . 
ئێمە بێ تۆ شیعرمان خاڵییە لە باران ، 
ئێمە بێ تۆ ، نازانین چۆن گوڵدانی ڕۆح 
لە تاق و پەنجەرەکانی ئاسمان دابنێین .  
بێ تۆ دەبینە خۆڵ ، دەچینە چاوی نیشتمانەوە ! 
داوود ؛
 بۆ جارێک 
بۆ یەک هەناسەش بێت خۆتم نیشان دە ، 
قیروسیا با هەرچی کێوەکانی دونیایە بسوتێن . 
تۆ بەیتێک لە دیوانەکەی خۆتم بدەرێ  
ئیدی خوای دەکرد هەموو شاخەکانی دونیا
 ئەندێشە دەیگرتن ، لە ترسا دەڕوخان ! 
بێ تۆ ، ژیان درەختێکە بێ هاوڕێ ، بێ گەڵای پێکەنین . 
بێ تۆ ، ژنێتیی ڕووبار دەکەوێتە ئاگری خەتەرەوە !
بێ تۆ ،
 سەبەتەی کچان پڕن لە نامەی گلەیی لە ژیان . 
داوود 
بێ تۆ ، من چاوەڕێی مردنێکم 
وەک  مردنی پەپولەیەک بەسەر خاچەکەی عیساوە 
وەک  مردنی تریفەیەک
 بەدەم چۆڵکردنی گوندێکی ئەنفالەوە !
داوود ، 
دەترسم هەتا تۆ دەگەڕێیتەوە 
 کەشتییەک کە ئومێدی بار کردووە 
  نەگاتە ئەم بەندەرە ڕوخاوەی من . 
دەترسم هەتا میوەی گەڕانەوەی تۆ پێدەگات 
قەل و داڵەکانی سەر سنوور 
سینگی نیشتمان شەقار شەقار کەن و 
هەناسەیەک بۆ گۆرانی نەهێڵنەوە ! 
دەترسم داوود 
دەترسم قەلەڕەشەکانی سەحرا بگەن و 
چاوە کزەکانی شیعری من هەڵکۆڵن و 
فریای بینینت نەکەوم داوود ! 
دەمەوێ لەسەر دیوارە سپییەکانی دڵم 
بە بۆیەی ئاویی ڕەسمی شاخێکی سەوز بکێشم و
لەسەری بنووسم ؛ 
دەگەڕێتەوە ،  
ئەمجارە بە چەپکێ نوورەوە دەگەڕێتەوە داوود !