هیوا مەگری، هەنسکی نیوەشەو بەس هەڵدە، بەس بگری!
لە چاوی بێقەرارم بۆچی دەرمانی وەنەوز ئەبڕی؟
Image removed.
کوڕی خۆم! کۆرپەڵەم! میوانی دونیای تازە خوڵقاوم!
ئەدا گریەت بە زەبری چز، لە ڕۆحی پڕ گلاراوم!
Image removed.
چییە ئەم گریە بێغایە، کڕووزەی نیوەشەو خورپێن؟
چییە ئەم قەترە وردانەی لە چاوت بێ مەئال ئەڕژێن؟
Image removed.
لەگەڵ ئەو غونچە ساوایەی لە سەر خەڵفی بەهار ئەڕوێ
چییە فەرقت؟ لە بەر چی ئەو هەتاکوو سیس ئەبێ ئەنوێ؟
Image removed.
وەکوو ئەو بەرخە بچکۆڵەی کە هەر ئێستا لە دایک بوو،
لەبەر چی نەشئەیی یاری هەڵتناداتە سەر پاشوو؟
Image removed.
ئەڵێی ئەو زەڕنەقووتەی پەپکەمارە فەڕشی هێلانەی:
چ ئێشێکە، کوڕم، بۆ چی لە سەر ئەو هەڵکڕووزانەی؟
Image removed.
چییە توخوا؟ چ سیڕڕێکە وەها مەحکوومی گریانی،
کە تۆ هێشتا لە خەم ناگەی؟ لە مەعنای گریە نازانی؟
Image removed.
ئەگەر وەک باوکە حەسرەتدیدەکەت زەهرت بچێژایە
زەمان گەردی ئەمەلتی گشت بە دەم باوە بپێژایە
Image removed.
لە ناو کڵپە و بڵێسەی نائومێدی و حەسرەتا یەکسەر،
 بسووتایە بەهاری عومری جوانیت: هەم گوڵ و هەم بەر!
Image removed.
 بەڵێ، ڕۆڵەم، ئەگەر وەک من کەمێک بەدبەختیی ئیدراکیش، 
لە تۆیشی ڕەش بکردایە، نەوەک شەو، ڕۆژی ڕووناکیش،
Image removed.
حەقت بوو عەرش بلەرزێنی، بە ناڵەی ڕۆحی پڕ ئێشت،
لە ئەستێرەی سەما بپژێنی فرمێسکی دڵێ ڕێشت!
Image removed.
حەقت بوو ئەو هەموو گریانی نامەفهووم و بێ مەعنا:
زمانی بەست و تەقریری شکاتت بێ لە دەست دنیا!
Image removed.
حەقت بوو بێ وچان بگری بە سەر تاوانی باوکیما،
بەحر پڕ کەی لە تف، بیدەی بە ناوچاوانی باوکیما!
Image removed.
بەڵام، ڕۆڵەم، کە تۆ ئێستا لە فەجری زیندەگانیتای،
لە بەر دەرگای تەلیسمی بەختی مەجهوول و نیهانیتای،
Image removed.
بە چی مەعلووم بە شوێن هی منا ئەڕژێ چەمی عومرت؟
سەراسەر پێ کەنین و خوڕڕەمی نابێ خەمی عومرت؟
Image removed.
بەڵێ بەرخم! ئەگەر چی هەر وەکوو یەک ژینی گش لایە
لە بەینی بێشکە و قەبرا، بڕینی عەینی ڕێگایە!
Image removed.
هەموو هەر قافڵەی بێ ئیختیاری سەر زەمینێکین
هەموو دێین و دەڕۆین، تاکوو ئەگەین، یەعنی ئیتر ئەمرین،
Image removed.
وەلێ کۆچی ژیان کۆچێکی پڕ سیحر و پڕ ئەفسوونە:
لە یەک سەرچاوە دوو قەترە: یەکێ لێڵە، یەکێ ڕوونە!
Image removed.
هەیە وەک من بە سەر دڕکا ئەنێ هەنگاوی ئاوارە،
هەیە هی وایش کە فەرشی ژێری پێی ئاوریشمی گوڵزارە!
Image removed.
ئەوەندەی ڕۆحی مەئیووس و مەلوول تاری ئەکا دنیا،
ئەوەندەش نوور لە ڕۆحی شادەوە ئەڕژێ بە سەر سەریا!
Image removed.
کوڕم! هەر وەک لە ئوعجووبەی ژیانا بەختی بەد ئەگری،
شتێکیش -بەختیاری- پێکەنین گرتوویە چواردەوری!
Image removed.
بە خۆڕایی مەترسە، خەم مەخۆ، مەگری لە ئێستاوە!
بە چی مەعلووم کە چی لەو تەختی ناوچاوانە نووسراوە؟

 
------------------
دیوانی گۆران، بڵاوکراوەی پانیز، تاران، 1382